मध्य रेल्वेवर आज मेगाब्लॉक

मुंबई (प्रतिनिधी) : मुंबई विभागातील मध्य रेल्वेच्या काही मार्गांवर रविवारी २८ ऑगस्ट रोजी देखभाल दुरुस्तीच्या कामामुळे रेल्वे सेवा काही तासांसाठी बंद राहणार आहेत. रविवारी सकाळी ११ ते सायंकाळी ५ या वेळेत मेगाब्लॉक घेण्यात येणार असल्याची घोषणा रेल्वे अधिकाऱ्यांनी केली आहे. या वेळेत रेल्वे वाहतूक बंद राहील. हा मेगा ब्लॉक ट्रान्स हार्बर आणि हार्बर मार्गावर देखभाल दुरुस्तीच्या कामासाठी चालवला जाईल.

वाशी / नेरुळ / पनवेलसाठी सकाळी १०.३५ ते दुपारी ४.०७ वाजेपर्यंत ठाण्याहून सुटणाऱ्या डाऊन मार्गावरील सेवा आणि वाशी / नेरुळ / पनवेलहून ठाण्यासाठी सुटणाऱ्या सकाळी १०.२५ ते दुपारी ४.०९ या वेळेत अप मार्गावरील सेवा बंद राहतील. सकाळी ११.१६ ते दुपारी ४.४७ या कालावधीत छत्रपती शिवाजी महाराज टर्मिनस मुंबई / वडाळा रोडवरून वाशी / बेलापूर / पनवेलकडे जाणाऱ्या डाऊन हार्बर मार्गावरील सेवा बंद राहतील.

सकाळी १०.४८ ते दुपारी ४.४३ वाजेपर्यंत छत्रपती शिवाजी महाराज टर्मिनस मुंबईहून सुटणाऱ्या वांद्रे / गोरेगावला जाणाऱ्या डाऊन हार्बर मार्गावरील सेवा बंद राहतील. छत्रपती शिवाजी महाराज टर्मिनस मुंबईसाठी सकाळी ९.५३ ते दुपारी ३.२० पर्यंत पनवेल / बेलापूर / वाशीहून सुटणारी अप हार्बर मार्गावरील सेवा आणि गोरेगाव / वांद्रे येथून सकाळी १०.४५ ते सायंकाळी ५.१३ पर्यंत छत्रपती शिवाजी महाराज टर्मिनस मुंबईसाठी अप हार्बर मार्गावरील सेवा बंद राहतील.

मध्य रेल्वेच्या माहितीनुसार, मेगाब्लॉक दरम्यान पनवेल ते कुर्ला (प्लॅटफॉर्म क्रमांक ८) दरम्यान विशेष सेवा चालवल्या जातील. हार्बर मार्गावरील प्रवाशांना २८ ऑगस्ट रोजी सकाळी १० ते संध्याकाळी ६ वाजेपर्यंत मेन लाईन आणि पश्चिम रेल्वेवरून प्रवास करण्याची परवानगी आहे. कारण मेन लाईनवर कोणतीही ट्रेन सेवा स्थगित केली जाणार नाही.