डोंबिवली (वार्ताहर) : दत्तनगर येथील स्वातंत्र्यसेनानी स्मृती स्थळाजवळील ठाणे जिल्ह्यातील सर्वोच्च उतुंग असलेल्या १५० फूट ध्वजस्तंभावरील झेंडा खासदार डॉ. श्रीकांत शिंदे आणि पालिका आयुक्त भाऊसाहेब दांडगे यांच्या हस्ते फडकविण्यात आला. यावेळी जय हिंद घोषणांनी परिसर दणाणून गेला.
कल्याण-डोंबिवली महानगरपालिका प्रभाग क्रमांक ७६ व ७७ मध्ये स्वातंत्र्याचा अमृत महोत्सव साजरा करण्यात आला. शिंदे समर्थक नगरसेवक राजेश मोरे आणि नगरसेविका भारती मोरे यांनी हा सोहळा आयोजित केला होता. या राष्ट्रीय उत्सव सोहळ्यात हजारो डोंबिवलीकर सहभागी झाले होते. प्रभागात सप्तरंगी विद्युत रोषणाईने संपूर्ण विभाग झगमगला होता.
यावेळी खासदार डॉ. श्रीकांत शिंदे म्हणाले, ७५ व्या वर्षी आज देश महाशक्तीच्या दिशेने वाटचाल करत आहे. अनेक विकासाची कामे देशात, अनेक शहरात सुरू आहेत. देशाच्या अमृत महोत्सव वर्षानिमित्त सर्व देश आनंदाने कार्यक्रम साजरा करत आहे.
यावेळी सहायक पोलीस आयुक्त सुनील कुराडे, माजी नगरसेवक रमेश म्हात्रे, मंदार हळबे, रवी पाटील, नितीन पाटील, संजय पावशे, रणजित जोशी, माजी नगरसेविका वृषाली जोशी, पालिका कार्यकारी अभियंता रोहिणी लोकरे, सायली विचारे, सुरेखा पांडे, राजेश कदम, गजानन व्यापारी आदी मान्यवर उपस्थित होते.