युनिफाइट नॅशनल चॅम्पियनशिपमध्ये महाराष्ट्र अव्वल

मुंबई (प्रतिनिधी) : २१ आणि २२ मे २०२२ रोजी पालमपूर, हिमाचल प्रदेश येथे युनिफाइट इंडियन असोसिएशनद्वारे युनिफाइट नॅशनल चॅम्पियनशिपचे आयोजन करण्यात आले होते. या स्पर्धेत महाराष्ट्र, आसाम, हिमाचल प्रदेश, हरियाणा, जम्मू आणि काश्मीर, पंजाब, तामिळनाडू आणि दिल्ली या संघांनी सहभाग घेतला होता, ज्यामध्ये महाराष्ट्र राज्य सर्व राज्यांमध्ये प्रथम आले आणि युनिफाइट इंडियन असोसिएशनने पारितोषिक देऊन सत्कार केला.

युनिटी मार्शल आर्ट्स सेंटर, डोंबिवली येथून १६ विद्यार्थ्यांची शिहान (६ डॅन ब्लॅक बेल्ट) सुनील वडके यांच्या नेतृत्वाखाली निवड करण्यात आली होती आणि या सर्व १६ विद्यार्थ्यांनी पदके मिळवून महाराष्ट्र राज्याला प्रथम पारितोषिक मिळवून देण्यास मोलाचा वाटा दिला.

युनिफाइट इंडियन असोसिएशनद्वारे आयोजित युनिफाइट नॅशनल चॅम्पियनशिपमध्ये सार्थक गोपाळ, अरित्रा कांची, पूजा दाभाडे, वरुण भोईर, आदित्य महाजन यांनी सुवर्णपदक मिळवले, तर निनाद उपाध्ये, आदिती कोष्टी, सेनाली सुनावणे, सुनीशा अस्वले, साई कदम, श्रेयस जठार यांनी रौप्यपदक आणि अभिषेक बेळगावकर, कोमल गोपाळ, चैतन्य परदेशी, प्रथम महाजन, दक्षा चव्हाण यांनी कांस्यपदक मिळवले. तसेच या विद्यार्थ्यांची येत्या काही महिन्यांत होणाऱ्या रशिया येथे आंतरराष्ट्रीय स्तरावर निवड झाली आहे.