मुंबई (प्रतिनिधी) : मुंबई महापालिका क्षेत्रात २६९ शाळा अनधिकृत असल्याची माहिती पालिकेने आपल्या संकेत स्थळावर दिली आहे. तर गेल्यावर्षी २८३ शाळा या अनधिकृत यादीमध्ये होत्या. यापैकी ४ शाळांना राज्य शासनाद्वारे ‘स्वयंअर्थसहाय्यित’ तत्त्वावर परवानगी देण्यात आलेली आहे. तर, ४ शाळांना राष्ट्रीय मुक्त विद्यालयी शिक्षा संस्थान यांची मान्यता प्राप्त झालेली आहे.
या व्यतिरिक्त गेल्यावर्षीच्या यादीतील ११ शाळा बंद झालेल्या आहेत. यानुसार यंदाच्या शैक्षणिक वर्षाच्या सुधारित यादीमध्ये १९ शाळांना वगळण्यात आले आहे. तसेच यंदाच्या शैक्षणिक वर्षाच्या यादीमध्ये नव्याने आढळून आलेल्या ५ शाळांचा समावेश करण्यात आला आहे.
दरम्यान, मुंबईतील प्राथमिक शाळांना शासनाची तसेच स्थानिक प्राधिकरणाची मान्यता घेणे बंधनकारक असते. मात्र ‘बालकांचा मोफत व सक्तीच्या शिक्षणाचा हक्क अधिनियम २००९’ कायद्यानुसार शासन/स्थानिक प्राधिकरणाची मान्यता न घेणाऱ्या अनधिकृत शाळांना पालिकेकडून नोटीस देण्यात येते. त्यानुसार २०२२-२३ या शैक्षणिक वर्षासाठी देखील या शाळांना शासनाची परवानगी आणणे अथवा शाळा बंद करण्याबाबतची नोटीस देण्यात आलेली आहे. तसेच या शाळांना कारवाईच्या सूचनाही देण्यात आल्या आहेत.
मुंबईतील एकूण २६९ अनधिकृत शाळांची यादी सन २०२२-२०२३ करीता तयार करण्यात आलेली असून, ती 'ब' महानगरपालिकेच्या संकेतस्थळावर उपलब्ध करुन देण्यात आलेली आहे. या तपशीलानुसार शैक्षणिक वर्ष २०२२-२३ साठी पालिका क्षेत्रातील ज्या शाळांचा समावेश अनधिकृत शाळांच्या यादीमध्ये आहे, त्या शाळांमध्ये आपल्या पाल्याचा प्रवेश घेण्यात येऊ नये, असे आवाहन मुंबई महानगरपालिकेच्या शिक्षण खात्याद्वारे करण्यात आले आहे. तर अनधिकृत शाळांकडून दंड वसूल करण्याबाबत शाळांच्या यादीसह विनंतीपत्र मुंबई विभागाच्या शिक्षण उपसंचालकांना पाठवण्यात येत असल्याचेही पालिकेकडून सांगण्यात आले आहे.