मुंबई : सायन पनवेल महामार्गावर शनिवारी सकाळी ट्रक उलटल्यामुळे मोठी वाहतूक कोंडी झाली. परिणामी पनवेलच्या दिशेने जाणाऱ्या वाहनांच्या तीन ते चार किलोमीटरपर्यंत लांबच लांब रांगा लागल्या होत्या. ट्रक उलटल्याची माहिती मिळाल्यावर वाहतूक पोलिसांनी घटनास्थळी धाव घेत या ट्रकला हटवण्यात आले असले तरी वाहतूक संथ गतीने सुरू होती. मुंबई-ठाण्याहून पनवेलच्या दिशेने जाणाऱ्या वाहनांचा या ट्रक अपघातामुळे मोठ्या प्रमाणात खोळंबा झाला.
क्षमतेपेक्षा अधिक सामान या ट्रकमध्ये भरण्यात आले होते त्यामुळे हा ट्रक हायवेवर पलटी झाला, अशी माहिती वाहतूक पोलिसांनी दिली. शनिवारी अनेकजण मुंबईबाहेर जाण्यासाठी निघतात त्यामुळे ही वाहतूक पूर्ववत करण्यासाठी पोलिसांकडून तातडीने प्रयत्न करण्यात आले.