मुंबई (प्रतिनिधी) : वर्ल्ड ट्रेड सेंटर, मुंबई येथे ‘महाराष्ट्र एमएसएमई एक्सपो २०२२’ या तीनदिवसीय व्यावसायिक प्रदर्शनाची मंगळवारी दिमाखदार सोहळ्याने सांगता झाली. समारोप सोहळ्यास वर्ल्ड ट्रेड सेंटरच्या कार्यकारी संचालिका रूपा नाईक, झेप उद्योगिनीच्या संस्थापिका पूर्णिमा शिरीषकर आदी मान्यवर उपस्थित होते. सूक्ष्म, लघू व मध्यम उद्योग मंत्रालय आणि सूक्ष्म, लघू व मध्यम उद्योग विकास संस्था, "झेप उद्योगिनी" आणि "वी एमएसएमई" च्या सहकार्याने १ मे ते ३ मे दरम्यान हे प्रदर्शन आयोजित केले गेले.
१ मे महाराष्ट्रदिनी केंद्रीय सूक्ष्म, लघू आणि मध्यम उद्योगमंत्री नारायण राणे यांनी या प्रदर्शनाचे उद्घाटन केले. उद्योजक व्हा, रोजगार निर्माण करा असे आवाहन त्यांनी केले. केंद्र सरकार हे महिला उद्योजकांनी तयार केलेल्या उत्पादनांचे मार्केटिंग करणार असल्याची माहिती एमएसएमई महाराष्ट्रचे संचालक प्रशांत पार्लेवार यांनी दिली. वर्ल्ड ट्रेड सेंटरच्या कार्यकारी संचालिका रूपा नाईक यांनी महिला सक्षमीकरणावर भर देताना एमएसएमई विभागाने त्यांच्या विविध समित्यांवर महिला उद्योजिका सदस्यांची नियुक्ती करावी, अशी विनंती उद्योगमंत्र्यांना केली.
हभप शामसुंदर सोन्नर महाराज यांच्या पंढरीच्या वारीने कार्यक्रमाची सुरुवात झाली. यावेळी शाहीर अमर शेख यांचे नातू निशांत जैनू शेख यांनी महाराष्ट्राचा पवाडा सादर केला. दुसऱ्या दिवशीच्या सत्रात लघू-मध्यम उद्योग क्षेत्रातील व्यावसायिक संधी एमएसएमई विभागाच्या अधिकाऱ्यांनी विस्तृतपणे मांडल्या. तिसऱ्या दिवशीच्या सत्रात अपेडा या वाणिज्य मंत्रालयाच्या विभागाने शेती आणि अन्नप्रक्रिया या संदर्भातील निर्यातीच्या संधी यावर प्रकाशझोत टाकला.
झेप उद्योगिनीच्या संस्थापिका पूर्णिमा शिरीषकर यांनी यावेळी एमएसएमई महाराष्ट्र विभागाचे आभार मानले. सोबतच या प्रदर्शनात महाराष्ट्राच्या विविध जिल्ह्यांतून उद्योजक सहभागी झाले होते. त्यांचे देखील आभार शिरीषकर यांनी मांडले. भविष्यात देखील महाराष्ट्राच्या विविध भागांत अशा प्रकारे एमएसएमई एक्स्पो भरविण्याचा मानस त्यांनी व्यक्त केला.