कोलकाता सलग तिसरा पराभव टाळेल?

मुंबई (प्रतिनिधी) : आयपीएलच्या यंदाच्या हंगामातील ३०व्या लढतीमध्ये सोमवारी (१९ एप्रिल) सीसीआयच्या ब्रेबॉर्न स्टेडियमवर राजस्थान रॉयल्स आणि कोलकाता नाईट रायडर्स आमनेसामने आहेत. या लढतीद्वारे श्रेयस अय्यर आणि सहकाऱ्यांसमोर सलग तिसरा पराभव टाळण्याचे आव्हान आहे.

राजस्थानने पाच सामन्यांतून तीन विजयांसह (६ गुण) गुणतालिकेत अव्वल चार संघामध्ये स्थान राखले आहे. रॉयल्सनी सलग दोन विजय मिळवत आश्वासक सुरुवात केली. मात्र,बंगळूरुविरुद्ध पराभव पाहावा लागला. लखनऊ सुपर जायंट्सवर मात करताना ते विजयीमार्गावर परतले. मात्र, मागील लढतीत गुजरात टायटन्सविरुद्ध पराभव झाला. त्यामुळे टॉप फोरमधील स्थान कायम राखायचे असेल तर संजू सॅमसन आणि सहकाऱ्यांना विजय आवश्यक आहे.

राजस्थानकडून जोस बटलरने (एक शतक आणि एक अर्धशतक) फलंदाजीत चांगले योगदान दिले आहे. कर्णधार सॅमसनसह शिमरॉन हेटमायरने प्रत्येकी एक हाफसेंच्युरी मारली आहे. मात्र, देवदत्त पडिक्कल, यशस्वी जैस्वाल, रियान पराग या प्रमुख फलंदाजांनी निराशा केली आहे.

गोलंदाजीत लेगस्पिनर युझवेंद्र चहलने कमालीचे सातत्य राखले तरी वेगवान गोलंदाज ट्रेंट बोल्ट वगळता अन्य बॉलर्सना अपेक्षित कामगिरी करता आलेली नाही. अनुभवी ऑफस्पिनर आर. अश्विन आणि एम. प्रसिध कृष्णा हे निष्प्रभ ठरलेत. कोलकाता संघाला ६ सामन्यांत दोन पराभवांचा सामना करावा लागला. ते सलग आहेत. नाईट रायडर्सकडून आंद्रे रसेल, पॅट कमिन्स, कॅप्टन श्रेयस, वेंकटेश अय्यर आणि नितीश राणा यांनी प्रत्येकी एक अर्धशतक मारले तरी मागील दोन सामन्यांत फलंदाजी ढेपाळली.

मध्यमगती गोलंदाज उमेश यादवने बऱ्यापैकी बॉलिंग केली तरी ऑफस्पिनर सुनील नरिन, सी. वरुण, आंद्रे रसेल आणि पॅट कमिन्सला लौकिकाला साजेशी कामगिरी करता आलेली नाही. त्यामुळे पराभवांची मालिका खंडित करायची असेल तर कोलकाता संघाला सर्व आघाड्यांवर खेळ उंचवावा लागेल.

वेळ : रा. ७.३० वा. ठिकाण : ब्रेबॉर्न स्टेडियम, मुंबई