चिंताजनक : ओमायक्रॉन विषाणूबाबत संशोधनातून नवी माहिती समोर

नवी दिल्ली : जगभरातील अनेक देशांमध्ये ओमायक्रॉनचा आणखी एक व्हेरिएंट BA.2 वेगाने पसरत आहे. या व्हेरिएंटमुळे रुग्णसंख्येत वाढ होत असून युरोप, चीन, हाँग काँग आणि दक्षिण कोरियासह इतर देशातील स्थिती गंभीर होत चालली आहे. अशातच ओमायक्रॉन व्हेरिएंटबाबत नवी माहिती समोर आली असून यामुळे भारतातही चिंता व्यक्त केली जात आहे. ओमायक्रॉन विषाणूची लागण झालेला रुग्णही अनेक दिवस या विषाणूचा फैलाव करू शकतो, असा दावा एका संशोधनातून करण्यात आला आहे.

ओमायक्रॉन विषाणूबाधित रुग्णाकडून या विषाणूचा प्रादुर्भाव कोरोनाच्या इतर व्हेरिएंटच्या तुलनेत कमी काळ होतो, असं म्हटलं जात होतं. मात्र डच साथरोग तज्ञ डॉ. मर्जोलिन इरविन-नोस्टर यांनी मात्र वेगळी भूमिका मांडली आहे. कोरोनाच्या डेल्टा व्हेरिएंटने बाधित रुग्णाकडून पुढील चार ते सात दिवसांपर्यंत या विषाणूचा फैलाव होण्याचा धोका आहे, असं म्हटलं जात होतं. त्यानंतर आता ओमायक्रॉन व्हेरिएंटची लागण झालेल्या रुग्णाकडूनही पुढील सात दिवसांपर्यंत या विषाणूचा प्रादुर्भाव होण्याची शक्यता असल्याचा दावा करण्यात आला आहे. हा दावा खरा निघाल्यास संपूर्ण जगात ओमायक्रॉनच्या या लाटेत मोठ्या प्रमाणात रुग्णांची संख्या वाढण्याची भीती व्यक्त केली जात आहे.

ओमायक्रॉन व्हेरिएंटच्या संसर्गाचं प्रमाण कमी असल्याचं समजून अनेक देशांनी विलगीकरणाचा कालावधी कमी केला आहे. मात्र लक्षण दिसण्याच्या दोन दिवस आधीपासून आणि त्यानंतर सात दिवसांपर्यंत या विषाणूचा एका व्यक्तीकडून दुसऱ्या व्यक्तीला संसर्ग होण्याचा धोका असल्याचा दावा नव्या संशोधनातून करण्यात आल्याने विलगीकरणाचा कालावधी कमी असल्यास या विषाणूचा प्रादुर्भाव वाढण्याची भीती असल्याचं डॉ. मर्जोलिन यांचं म्हणणं आहे.

दरम्यान, जागतिक आरोग्य संस्थेकडून भारतातही पुढील काही महिन्यांत ओमायक्रॉनच्या चौथ्या लाटेचा इशारा देण्यात आला आहे. त्यामुळे प्रशासन अलर्ट झालं असून नागरिकांनाही कोरोना नियमांचं पालन करण्याचं आवाहन करण्यात आलं आहे.