नालासोपारा (वार्ताहर) : शनिवारी सकाळी १० च्या सुमारास वसई पूर्व नवघर येथील एका गारमेंट कंपनीच्या गोदामला आग लागली. ही आग आटोक्यात आणण्यात पालिकेच्या अग्नीशमन विभागाला यश आले आहे. दरम्यान, या आगीच्या घटनेत कोणतीही जीवितहानी झाली नाही. तथापि, गोदामातील सर्व माल जळून खाक झाला आहे. आगीचे नमके कारण कळले नसले तरी शॉक सर्किटमुळे आग लागल्याचा प्राथमिक अंदाज अग्नीशमन विभागाने वर्तवला आहे.
वसई पूर्व नवघर येथे असलेल्या व्हिक्टोरी रेडिमेट शर्ट बनवण्याच्या कंपनीत पहिल्या मजल्यावर गाळा क्रमांक ८ येथे सकाळी अचानक धूर निघू लागल्याने कामगारांनी वसई-विरार महालिकेच्या अग्निशमन विभागाला आग लागल्याची वर्दी दिली. अग्निशमन विभागाचे कर्मचारी पोहचपर्यंत स्थानिकांनी आग आटोक्यात आणण्याचा प्रयत्न केला. परंतु, काही क्षणांतच आगीचा भडका उडल्याने सदराची इमारत रिकामी करण्यात आली. अग्निशमन विभागाने तीन पाण्याचे बंब आणि १२ जवानांनी आगीवर नियंत्रण मिळवले.