नवाब मलिकांची ईडीकडून चौकशी

मुंबई : राज्याचे अल्पसंख्याक मंत्री व राष्ट्रवादी काँग्रेसचे प्रवक्ते नवाब मलिक हे आता अंमलबजावणी संचालनालयाच्या (ईडी) रडारवर आले आहेत. मिळालेल्या माहितीनुसार, नवाब मलिकांना चौकशीसाठी ईडीच्या कार्यालयात नेण्यात आले आहे. आज पहाटे ईडीचे पथक नवाब मलिक यांच्या घरी धडकले होते. त्यानंतर सकाळी सात वाजल्यापासून नवाब मलिक यांची ईडी कार्यालयात अधिकाऱ्यांकडून चौकशी सुरू आहे.

ईडी अधिकारी बुधवारी पहाटे सीआरपीएफच्या जवानांना घेऊन नवाब मलिक यांच्या कुर्ला येथील नूर मंजील या निवासस्थानी दाखल झाले. त्यानंतर ईडीने कोणतेही समन्स न देता नवाब मलिक यांना चौकशीसाठी नेल्यात आल्याचे सांगण्यात येते.

जुन्या मालमत्ता व्यवहार प्रकरणी नवाब मलिक यांची अंमलबजावणी संचालनालय (ईडी)कडून चौकशी केली जात असल्याची माहिती समोर आली आहे.

”देवेंद्र फडणवीस यांच्या सूचनेवरून केंद्रीय तपास यंत्रणा राज्यात कारवाई करतात. ईडीचे लोक कसे भेटतात, कशी चौकशी करतात हे आम्हाला माहिती आहे. वेळ आल्यावर आम्ही माहिती बाहेर काढू” असा इशारा नवाब मलिक यांनी याआधी दिला होता.

तर, आर्थिक गैरव्यवहारप्रकरणी अंडरवर्ल्ड डॉन दाऊद इब्राहीमचा भाऊ इक्बाल कासकर याला विशेष न्यायालयाने शुक्रवारी २४ फेब्रुवारीपर्यंत अंमलबजावणी संचालनालयाची (ईडी) कोठडी सुनावलेली आहे. त्यानंतर आता ईडीच्या रडारवर नवाब मलिक आले आहेत.