नवी दिल्ली : सुप्रीम कोर्टाने कर्नाटक हिजाब प्रकरणी सुनावणी करण्यास नकार दिला आहे. सुप्रीम कोर्टाने सांगितले की, कर्नाटक हायकोर्टात सुनावणी सुरू असून आम्ही या प्रकरणावर लक्ष ठेवून आहोत. त्यामुळे सुप्रीम कोर्टाने हिजाब प्रकरणी पुन्हा सुनावणीची तारीख देण्यास नकार दिला आणि दाखल करण्यात आलेली याचिका फेटाळून लावली.
हिजाब प्रकरणी त्याचा मोठ्या प्रमाणावर प्रसार करू नका आणि राष्ट्रीय स्तराचा मुद्दा बनवू नका, असे न्यायालयाने म्हटले आहे. काय होत आहे ते आम्हाला माहीत आहे. जर काही चुकीचे असेल तर आम्ही त्याचे संरक्षण करू. योग्य वेळेची वाट पाहा, असे सुप्रीम कोर्टाने म्हटले आहे.
हिजाब प्रकरणी सुप्रीम कोर्टात लवकर सुनावणी घेण्याची मागणी करण्यात आली होती. परंतु सुप्रीम कोर्टाने सांगितले की, योग्य वेळ आल्यावर या प्रकरणाची सुनावणी केली जाईल. सध्या हे प्रकरण उच्च न्यायालयात आहे. कोर्टाने वकिलांना सांगितले की, हा राष्ट्रीय स्तराचा मुद्दा बनवू नका आणि योग्य वेळी त्यात हस्तक्षेप केला जाईल.
कर्नाटक उच्च न्यायालयाने नुकताच अंतरिम आदेश जारी केला होता की पुढील आदेश येईपर्यंत शाळा पुन्हा सुरू कराव्यात आणि तोपर्यंत शाळांमध्ये धार्मिक पोशाखावर बंदी घालावी. उच्च न्यायालयाच्या या आदेशाला सर्वोच्च न्यायालयात आव्हान देण्यात आले होते. कर्नाटक उच्च न्यायालयातील तीन न्यायाधीशांचे खंडपीठ हिजाब प्रकरणी सुनावणी करत आहे. या खंडपीठात मुख्य न्यायमूर्ती रितुराज अवस्थी, जेएम खाजी आणि न्यायमूर्ती कृष्णा ए दीक्षित यांचा समावेश आहे.