वर्धा : हिंगणघाट येथील प्राध्यापिका अंकिता अरुण पिसुड्डे हिला भरचौकात पेट्रोल टाकून जाळून मारणारा नराधम विकेश उर्फ विक्की नगराळे याला जन्मठेपेची शिक्षा सुनावण्यात आली आहे.
अंतिम सुनावणीवेळी सरकारी पक्षाची बाजू मांडताना आज अॅड. उज्जवल निकम यांनी अनेक दाखले दिले. संपूर्ण महाराष्ट्राला हादरा देणाऱ्या आणि थरकाप उडविणाऱ्या या जळीत हत्याकांड घटनेला आज दोन वर्षे पूर्ण झाली. तब्बल दोन वर्षांनी या नराधमाला नियतीने न्यायालयाच्या माध्यमातून अंकिताच्या मृत्यूदिनीच शिक्षा सुनावली.
आरोपीचा गुन्हा सिद्ध झाल्याचे हिंगणघाट येथील जिल्हा व अतिरिक्त सत्र न्यायाधीश आर. बी. भागवत यांनी बुधवारी स्पष्ट केले होते. सर्वोच्च न्यायालयाच्या निर्देशांना केंद्रस्थानी ठेवून आरोपीच्या शिक्षेबाबत दोन्ही बाजूंची मते जाणून घेतल्यावर गुरुवारी या प्रकरणाचा निकाल जाहीर करण्यात येणार असल्याचे विशेष शासकीय अभियोक्ता ॲड. उज्ज्वल निकम यांनी सांगितले होते. त्यानुसार, आज न्यायालयाने दोषी विकेश उर्फ विक्की नरगाळे यास जन्मठेपेची शिक्षा सुनावली.
हिंगणघाट येथील नंदोरी चौकात ३ फेब्रुवारी २०२० रोजी सकाळी बसमधून उतरल्यावर अंकिता ही नेहमीप्रमाणे महाविद्यालयाकडे जात असताना आरोपी विकेश उर्फ विक्की नगराळे याने तिच्या अंगावर पेट्रोल टाकून पेटवून दिले. गंभीर जखमी अंकिताचा नागपूर येथील रुग्णालयात उपचार सुरू असताना सोमवार, १० फेब्रुवारी २०२० रोजी मृत्यू झाला. हिंगणघाटच्या वर्दळीच्या चौकातच घडलेल्या या धक्कादायक घटनेमुळे संपूर्ण महाराष्ट्र हादरला होता. त्यामुळे, सर्व महाराष्ट्राचे लक्ष या निकालाकडे लागले होते.