सिंधुदुर्ग : सिंधूदुर्ग जिल्हा बँकेच्या अध्यक्षपदी भाजपचे मनीष दळवी तर उपायध्यक्षपदी भाजपचे माजी जिल्हाध्यक्ष अतुल काळसेकर विराजमान झाले. आज दुपारी यासाठी झालेल्या निवडणुकीत त्यांनी महाविकास आघाडीच्या संचालकांचा ११ विरुद्ध ७ मतांनी पराभव केला. महाविकास आघाडीच्या नीता राणे अनुपस्थित राहिल्या. अध्यक्ष आणि उपाध्यक्ष पदासाठी महाविकास आघाडीने व्हिक्टर डान्टस व सुशांत नाईक यांचे उमेदवारी अर्ज दाखल करून चुरस निर्माण करण्याचा प्रयत्न केला. पण त्यांचा पराभव झाला.
सिंधुदुर्ग जिल्हा बँकेवर केंद्रीय मंत्री नारायण राणे यांच्या नेतृत्वाखालील संचालक मंडळाने विजय प्राप्त केला आहे. या निवडणुकीत१९ पैकी ११ सदस्य हे भाजपचे निवडून आले आहेत. तर आठ संचालक पदांवर महाविकास आघाडीच्या संचालकांना विजय मिळवता आला होता. आज गुरुवारी या बँकेच्या अध्यक्ष-उपाध्यक्षपदासाठी निवडणूक झाली. या निवडणुकीत भाजपचे मनिष दळवी यांनी अध्यक्षपदासाठी तर अतुल काळसेकर यांनी उपाध्यक्षपदासाठी अर्ज दाखल केले होते. तर, महाविकास आघाडीच्या वतीने अध्यक्षपदासाठी व्हिक्टर डांटस तर उपाध्यक्षपदासाठी सुशांत नाईक यांनी अर्ज दाखल केले होते. या निवडणुकीसाठी गुप्त पद्धतीने मतदान घेण्यात आले. या निवडणुकीत भाजपचे अध्यक्ष उपाध्यक्ष यांनी ११ विरुद्ध ७ अशा मतांनी विजय मिळवला. महाविकास आघाडीच्या सदस्या सौ. अनिता राणे या निवडणूक प्रक्रियेत अनुपस्थित राहिल्या होत्या.
सिंधुदुर्ग जिल्हा बँकेच्या अध्यक्षपदासाठी प्रत्यक्ष गुप्त पद्धतीने मतदान झाले. अध्यक्ष आणि उपाध्यक्ष पदांसाठी दोन्ही पक्षांकडून दाखल झालेले अर्ज वैध ठरल्याने प्रत्यक्ष गुप्त पद्धतीने मतदान झाले. जिल्हा बँक अध्यक्ष, उपाध्यक्ष निवडीसाठी केंद्रीय मंत्री नारायण राणे प्रत्यक्ष उपस्थित राहिले. जिल्हा बँकेकडे येऊन ते पुन्हा जवळच असलेल्या जिल्हा परिषदेत ठाण मांडून होते.
या निकालाची घोषणा निवडणूक निर्णय अधिकारी तथा कुडाळ प्रांत अधिकारी वंदना खरमळे यांनी करताच भाजपा कार्यकर्त्यांनी जल्लोष केला. घोषणा आणि फटाक्यांची आतिषबाजी करण्यात आली. बहुमत नसतांनाही महाविकास आघाडीने अध्यक्ष -उपाध्यक्ष पदाची निवड प्रतिष्ठेची केली होती. मात्र, महाविकास आघाडीच्या उमेदवारांना पराभव स्वीकारावा लागला. निवडीनंतर केंद्रीय मंत्री नारायण राणे यांनी बँकेला भेट देऊन नूतन अध्यक्ष - उपाध्यक्ष यांचे अभिनंदन केले.