‘शिवसेनेचा नवीन कामगारप्रमुख’

मुंबई (प्रतिनिधी) : राज्यसभेतील निलंबित खासदारांचे संसदेसमोर धरणे आंदोलन सुरू आहे. या आंदोलनाला राष्ट्रवादी काँग्रेसचे अध्यक्ष शरद पवार यांनी भेट दिली. यावेळी शिवसेना खासदार संजय राऊत यांनी शरद पवारांसाठी खुर्ची उचलून आणली. यावरून भाजपने संजय राऊत यांच्यावर जोरदार टीका केली आहे.

राज्यसभेतील १२ खासदारांचे संपूर्ण हिवाळी अधिवेशनासाठी निलंबन करण्यात आले आहे. त्याविरोधात हे खासदार संसदेच्या आवारात महात्मा गांधी यांच्या पुतळ्यासमोर आंदोलन करत आहेत. शरद पवार आणि सपा खासदार जया बच्चन यांनी मंगळवारी खासदारांच्या धरणे आंदोलनाला भेट दिली. यावेळी संजय राऊत, माजी केंद्रीय मंत्री प्रफुल्ल पटेल आदी उपस्थित होते. त्यावेळचा फोटो शेअर करत भाजप नेते निलेश राणे यांनी ट्वीट केले आहे. ‘पवार साहेबांनी नेमला शिवसेनेचा नवीन कामगार प्रमुख’, असा टोला निलेश राणे यांनी संजय राऊत यांना लगावला आहे.

भाजपचे आमदार अतुल भातखळकर यांनीही संजय राऊत यांच्यावर जोरदार टीका केली आहे. धरणे आंदोलन करणाऱ्या संसदेतील निलंबित खासदारांना भेटण्यासाठी शरद पवार गेले. तेव्हा त्यांना खुर्ची देण्यासाठी सुरू असलेली संजय राऊत यांची लगबग पाहा. आम्हाला उगीच वाटत होते की, शिवसेनाप्रमुख बाळासाहेब ठाकरे हे संजय राऊत यांचे गुरू आहेत, पण खरे गुरू तर शरद पवारच आहेत, असा खोचक टोला भातखळकर यांनी लगावला आहे.