नागपूर : अमरावती, नांदेड, मालेगाव शहरातील दंगल कशी झाली? हिंसक वळण कसं लागलं, याच्या चौकशीचे आदेश दिले आहेत. चौकशीचा अहवाल समोर आल्यानंतर दोषींवर कारवाई करण्यात येईल, असे गृहमंत्री दिलीप वळसे-पाटील म्हणाले. गडचिरोलीत २६ नक्षलींना कंठस्थान घालणाऱ्या पोलिसांचं अभिनंदन वळसे-पाटील यांनी केले. गृहमंत्री दिलीप वळसे-पाटील हे नागपुरात ऑरेंज सिटी रुग्णालयांमध्ये नक्षलवादी चकमकीतमध्ये जखमी झालेल्या पोलीस जवानांच्या भेटीसाठी आले. त्यावेळी त्यांनी प्रसारमाध्यमांशी संवाद साधला.
अनिल बोंडे यांना अटक
अमरावती : दंगल भडकवणे, दंगल भडकवण्यासाठी प्रवृत्त करणे, अशा कलमांतर्गत भाजप नेते डॉ. अनिल बोंडेंना अटक केली. सिटी कोतवाली पोलिसांनी ही कारवाई केली आहे. डॉ. अनिल बोंडेंच्या नेतृत्वात शनिवारी भाजपनं अमरावतीत आंदोलन केलं होतं. त्यात झालेल्या हिंसेला बोंडे जबाबदार असल्याचा ठपका ठेवत पोलिसांनी बोंडेंना अटक केली