मुंबई : गृह विभागाने मुंबईचे माजी पोलीस आयुक्त परमबीर सिंग यांच्यावर कारवाई करत परमबीर सिंग यांना दिले जाणारे वेतन रोखले असल्याची माहिती पुढे येत आहे. मुंबईचे माजी पोलीस आयुक्त परमबीर सिंग गेल्या काही महिन्यांपासून बेपत्ता आहेत. परमबीर यांच्यावर खंडणी तसेच बेकायदेशीर कृत्य, ॲट्रॉसिटीअंतर्गत मुंबई, ठाणे येथे गुन्हे दाखल आहेत.
यासंबंधी चौकशीसाठी पोलीस विभागाकडून वेळोवेळी चौकशीसाठी हजर राहण्याचे आदेशही देण्यात आले होते. मात्र अद्यापही परमबीर सिंग नेमके कुठे आहेत? याबाबत राज्य सरकारला कोणतीच माहिती नाही. मुंबईचे पोलीस आयुक्त असताना राज्याचे तात्कालीन गृहमंत्री अनिल देशमुख यांच्यावर शंभर कोटी रुपये अवैधरीत्या जमा करण्याचा आरोप पत्राद्वारे परमबीर यांनी केला होता.
या आरोपानंतर परमबीर बेपत्ता असल्याची चर्चा आहे. परमबीर सिंग यांची मनसुख हिरेन हत्या प्रकरणात पदावरून उचलबांगडी झाली होती. त्यानंतर परमबीर सिंग यांची होमगार्ड विभागांमध्ये बदली करण्यात आली होती. मात्र त्यांनी आपला पदभार स्वीकारला नाही. पदभार स्वीकारण्याआधीच त्यांनी आठ दिवसांची आणि त्यानंतर १५ दिवसांची रजा घेतली. मात्र त्या रजा संपल्यानंतरही परमबीर सिंग पदावर रुजू झाले नाहीत.