ऑक्टोबरच्या १० दिवसांत चिकनगुनीयाचे १५ रुग्ण
सीमा दाते
मुंबई : मुंबई महापालिका कोरोनाची वाढती रुग्णसंख्या पाहून आधीच चिंतेत आहे. त्यातच आता मुंबईत मलेरिया, डेंग्यू पाठोपाठ चिकनगुनीया फोफावताना पाहायला मिळत आहे.
गेल्या दोन वर्षांत चिकनगुनीयाच्या एकाही रुग्णाची मुंबईत नोंद झाली नव्हती; मात्र यावर्षी केवळ ऑक्टोबरच्या १० दिवसांत १५ रुग्ण आढळले आहेत. तर जानेवारीपासून आतापर्यंत ३० रुग्ण आढळले आहेत.
कोरोनाच्या तिसऱ्या लाटेची शक्यता कमी असली तरी कोरोना रुग्णांच्या वाढत्या संख्येमुळे महापालिकेची डोकेदुखी वाढलेली असताना आता मलेरिया, डेंग्यू आणि चिकनगुनीया यासारख्या साथीच्या आजारांनी डोके वर काढले आहे. महत्त्वाचे म्हणजे गेल्या दोन वर्षांत चिकनगुनीयाचा एकही रुग्ण मुंबईत नव्हता. असे असताना यावर्षी २०२१ मध्ये ऑक्टोबरच्या केवळ १० दिवसांत १५ चिकनगुनीयाच्या रुग्णांची नोंद झाली आहे. तर दुसरीकडे मलेरिया आणि डेंग्यूचे रुग्ण देखील केवळ दहा दिवसांत जास्त आहेत. मलेरियाचे रुग्ण ऑक्टोबरच्या दहा दिवसांत १६९ तर डेंग्यूचे ९७ रुग्ण आहेत.
दरवर्षी सप्टेंबरनंतर मलेरिया आणि डेंग्यूच्या आजारात वाढ होताना पहायला मिळते. त्याच प्रमाणे यंदाही तशीच रुग्ण संख्या आहे. मात्र दोन वर्षांपासून मुंबईतून हद्दपार झालेला चिकनगुनीया मात्र यावर्षी डोके वर काढत आहे. त्यामुळे पुन्हा मुंबईत साथीच्या आजाराबाबत भीतीचे वातावरण आहे. दरम्यान गेल्यावर्षी २०२० मध्ये मलेरियाचे ५००७ रुग्ण आढळले होते. मात्र यावर्षी केवळ दहा महिन्यांत ४१७२ रुग्ण आढळले आहेत. गेल्यावर्षी २०२० मध्ये १२९ डेंग्यूचे रुग्ण आढळले होते. तर यावर्षी १० महिन्यांत ५७३ रुग्ण आढळले आहेत.
दरम्यान मुंबई महापालिकेने साथीच्या आजारांसंदर्भात पूर्वनियोजन केले असले तरी मुंबईकरांना स्वच्छता पाळा, पावसाचे पाणी साठू देऊ नका, जिथे डास होतील ती जागा साफ ठेवा असे आवाहन करण्यात आले आहे. विशेषतः चिकनगुनीया पासून काळजी घेण्याचे आवाहन केले आहे.