एमसीए निवडणुकीवर कोर्टाचे ग्रहण!

१५५ क्लब मतदारांवर आक्षेप; उच्च न्यायालयाने 'जैसे थे' स्थिती राखण्याचे दिले निर्देश

मुंबई: १२ नोव्हेंबर रोजी होणाऱ्या मुंबई क्रिकेट असोसिएशनच्या (MCA) निवडणुकीपूर्वीच कायदेशीर आव्हान उभे राहिले आहे. एमसीएचे माजी कार्यकारी समिती सदस्य श्रीपाद हळबे आणि इतर सदस्यांनी अंतिम मतदार यादीत १५५ हून अधिक क्रिकेट क्लबचा समावेश केल्यामुळे उच्च न्यायालयात धाव घेतली आहे.

न्यायमूर्ती रियाज छागला आणि फरहान दुबाश यांच्या खंडपीठासमोर मंगळवारी झालेल्या सुनावणीत न्यायालयाने निवडणुकीची प्रक्रिया अंतिम करण्याला तातडीने स्थगिती दिली. पुढील सुनावणी होईपर्यंत पात्र उमेदवारांची अंतिम यादी प्रकाशित न करण्याचे आणि सध्याची स्थिती (status quo) कायम ठेवण्याचे निर्देश निवडणूक अधिकाऱ्यांना दिले आहेत.

निवडणूक अधिकाऱ्यांनी आपला युक्तिवाद करताना सांगितले की, अंतिम यादी निश्चित करण्यापूर्वी १७ ते २० ऑक्टोबर दरम्यान सादर झालेल्या सर्व आक्षेपांचे त्यांनी काळजीपूर्वक पुनरावलोकन केले आहे.

या निवडणुकीकडे सर्वांचे लक्ष लागले आहे, कारण यात भाजपचे प्रसाद लाड, राष्ट्रवादी काँग्रेसचे जितेंद्र आव्हाड, शिवसेना (उद्धव बाळासाहेब ठाकरे) चे मिलिंद नार्वेकर आणि परिवहन मंत्री प्रताप सरनाईक यांचे पुत्र विहंग सरनाईक यांसारखे अनेक प्रमुख राजकीय नेते सहभागी आहेत. याशिवाय, विद्यमान एमसीए अध्यक्ष अजिंक्य नाईक आणि भारताच्या महिला क्रिकेट संघाच्या माजी कर्णधार डायना एडुलजी यांनीही प्रमुख पदांसाठी उमेदवारी अर्ज दाखल केले आहेत.