वॉशिंग्टन डीसी : टेक क्षेत्रातील दिग्गज कंपनी मायक्रोसॉफ्टने एक महत्त्वपूर्ण घोषणा केली आहे. जगभरात मोठ्या प्रमाणावर वापरल्या जाणाऱ्या विंडोज १० ऑपरेटिंग सिस्टमसाठी असणारा 'सपोर्ट' (Support) लवकरच बंद केला जाणार आहे. कंपनीने दिलेल्या माहितीनुसार, १४ ऑक्टोबर २०२५ ही विंडोज १०च्या समर्थनाची अंतिम तारीख असणार आहे. या तारखेनंतर, विंडोज १० वापरणाऱ्या डिव्हाईसला कोणतेही नवीन सुरक्षा अपडेट्स, फीचर्स किंवा तांत्रिक मदत मिळणार नाही. विंडोज १० वापरणाऱ्या सर्व युजर्ससाठी ही एक महत्त्वाची सूचना आहे. आपले डिव्हाईस आणि डेटा सुरक्षित ठेवण्यासाठी त्यांनी विंडोज ११ कडे जाण्याचा किंवा ESU प्रोग्रामचा विचार करणे आवश्यक आहे, असे कंपनीने म्हटले आहे. मायक्रोसॉफ्टने सर्व युजर्सना सोयीसाठी आणि डेटा सुरक्षिततेसाठी विंडोज ११ (Windows 11) ऑपरेटिंग सिस्टमवर हळूहळू अपग्रेड करण्याचा सल्ला दिला आहे. कंपनीचा दावा आहे की, विंडोज ११ मध्ये, पूर्वीच्या व्हर्जनच्या तुलनेत सुरक्षा-संबंधित समस्यांमध्ये ६२ टक्के कपात झाली आहे आणि कामाचा वेग ५०टक्के पर्यंत वाढतो.
