बॉम्ब शोधक पथक आणि पोलिसांचा ताफा घटनास्थळी दाखल

मुंबई : मुंबईतील परळ भागात असलेल्या जगप्रसिद्ध टाटा मेमोरियल कॅन्सर रुग्णालयाला बॉम्बने उडवून देण्याची निनावी धमकी मिळाल्याने आज मोठी खळबळ उडाली आहे. या धमकीनंतर पोलीस प्रशासन आणि रुग्णालय व्यवस्थापन तातडीने सतर्क झाले असून खबरदारीचे उपाय म्हणून रुग्णालय परिसर रिकामा करण्यात आला आहे.

पोलीस आणि श्वानपथकाकडून तपासणी सुरू

धमकीचा फोन किंवा संदेश मिळताच मुंबई पोलिसांनी तातडीने रुग्णालयाकडे धाव घेतली. सध्या घटनास्थळी बॉम्ब शोधक व नाशक पथक (BDDS) दाखल झाले असून, श्वानपथकाच्या मदतीने रुग्णालयाच्या प्रत्येक मजल्याची आणि कोनाकोपऱ्याची कसून तपासणी केली जात आहे. पोलीस उपायुक्तांसह वरिष्ठ अधिकारी परिस्थितीवर लक्ष ठेवून आहेत.

https://prahaar.in/2026/01/05/chandigarh-aap-sarpanch-jharmal-singh-murder-case-armed-men-shot-and-disappeared-in-13-seconds-ex-cm-sukhbir-singh-badal-share-footage/

रुग्ण आणि नातेवाईकांची धावपळ

टाटा रुग्णालय हे कर्करोगाच्या उपचारासाठी देशातील सर्वात मोठे केंद्र असल्याने तिथे दररोज हजारो रुग्ण आणि त्यांचे नातेवाईक उपस्थित असतात. बॉम्बची बातमी पसरताच परिसरात भीतीचे वातावरण निर्माण झाले. सुरक्षेच्या कारणास्तव प्रशासनाने रुग्णांना सुरक्षित स्थळी हलवण्यास सुरुवात केली असून, बाह्यरुग्ण विभाग (OPD) आणि इतर गर्दीच्या जागा रिकाम्या करण्यात आल्या आहेत.

धमकीचा शोध सुरू

हा निव्वळ अफवेचा प्रकार आहे की घातपाताचा प्रयत्न, याचा तपास पोलीस करत आहेत. ज्या क्रमांकावरून किंवा माध्यमातून ही धमकी आली, त्याचा तांत्रिक शोध घेतला जात आहे. “नागरिकांनी घाबरून जाऊ नये, पोलीस सर्वतोपरी तपास करत आहेत,” असे आवाहन प्रशासनाकडून करण्यात आले आहे.