दिल्ली: दिल्लीच्या लाल किल्ला परिसरात झालेल्या कार बॉम्बस्फोट प्रकरणात राष्ट्रीय तपास यंत्रणेला मोठे यश मिळाले आहे. आत्मघातकी बॉम्बरसह दहशतवादी कट रचणाऱ्या व्यक्तीला १६ नोव्हेंबर रोजी अटक करण्यात आली. अटक केलेल्या आरोपीचे नाव आमिर रशीद अली आहे. आमिरला ११ नोव्हेंबर रोजी ताब्यात घेण्यात आले होते. यानंतर त्याची दीर्घ चौकशी करण्यात आली. या चौकशीमध्ये उघड झालेल्या बाबींमुळे त्याला अटक करण्यात आली.

सुरुवातीला दिल्ली पोलिस स्फोटाचा तपास करत होते, परंतु नंतर हे प्रकरण एनआयएकडे सोपवण्यात आले. प्रकरण ताब्यात घेतल्यानंतर, एनआयएने मोठ्या प्रमाणात शोध मोहीम सुरू केली. तपासात असे दिसून आले की, जम्मू आणि काश्मीरमधील रहिवासी आमिरने पुलवामा येथील उमर उन नबी नावाच्या व्यक्तीसोबत हल्ल्याची योजना आखली होती.

https://prahaar.in/2025/11/17/will-sheikh-hasina-be-hanged-final-verdict-on-crimes-against-humanity-today-bangladesh-on-high-alert/

तपासात दिसून आले की, आमिरने आत्मघाती बॉम्बर आरोपी उमर उन नबीसोबत मिळून वाहनातून चालणारे इम्प्रोव्हाइज्ड एक्सप्लोझिव्ह डिव्हाइस (VBIED) तयार करण्याचा कट रचला होता. याचा अर्थ असा की, आयईडीचा स्फोट करण्यासाठी एका कारचा वापर शस्त्र म्हणूनही करण्यात आला होता. तपासादरम्यान, हे देखील उघड झाले की आमिर याच उद्देशाने दिल्लीला आला होता आणि त्याने कार खरेदीमध्ये मदत केली होती.

फॉरेन्सिक तपासणीद्वारे, एनआयएने स्फोटाच्या वेळी गाडीमध्ये असलेल्या चालकाची ओळख पटवली आहे. त्याचे नाव उमर उन नबी असे आहे. पुलवामा येथील रहिवासी उमर हा हरियाणातील फरीदाबाद येथील अल-फलाह विद्यापीठात जनरल मेडिसिन विभागात सहाय्यक प्राध्यापक होता. एनआयएने उमर उन नबीचे आणखी एक वाहनही जप्त केले आहे. जप्त केलेल्या गाडीबद्दल अजून पुरावे गोळा करण्याचे काम सुरू आहे.