नवी दिल्ली: दिल्लीच्या इंदिरा गांधी आंतरराष्ट्रीय विमानतळावरील धक्कादायक प्रकार समोर आला आहे. विमानतळावरील अधिकाऱ्यांनी सोन्याची तस्करी करण्याचा प्रयत्न करणाऱ्या महिलेला पकडले आहे. संबंधित महिलेने आपल्या अंतर्वस्त्रांमध्ये ९९७.५ ग्रॅमची सोन्याची बिस्कीटे लपवली असून सीमाशुल्क विभागाच्या अधिकाऱ्यांनी तिचा तस्करीचा डाव उधळून लावला आहे. मिळालेल्या माहितीनुसार, शुक्रवार, २४ ऑक्टोबरला ही कारवाई करण्यात आली. ही महिला प्रवासी यांगून (म्यानमार) येथून दिल्लीला आली.

प्रवासादरम्यान महिला आपल्या मौल्यवान वस्तू बॅगमध्ये ठेवतात. मात्र दिल्लीच्या इंदिरा गांधी आंतरराष्ट्रीय विमानतळावर पकडण्यात आलेल्या महिलेने आपल्या अंतर्वस्त्रांमध्ये सोने लपवून ठेवले होते. ही महिला विमानतळावरील ग्रीन चॅनलमधून बाहेर पडण्यासाठी प्रयत्न करत होती. ग्रीन चॅनेल अशा प्रवाशांसाठी असते ज्यांच्याकडे कोणतेही प्रतिबंधित किंवा करपात्र वस्तू नसतात. यावेळी अधिकाऱ्यांची नजर महिलेवर पडली आणि त्यांना संशय आल्याने त्यांनी चौकशी सुरू केली. त्यामुळे संपूर्ण विमानतळावर खळबळ माजली.

https://prahaar.in/2025/10/25/wife-kills-husband-over-suspicion-of-character-in-pune/

चौकशी सुरु असताना, महिलेने तिच्या अंतर्वस्त्रांमध्ये सहा सोन्याची बिस्कीटं लपवली असल्याची एक धक्कादायक गोष्ट अधिकाऱ्यांसमोर आली. कस्टम विभागाने तात्काळ ही सोन्याची बिस्कीटं जप्त करून महिलेवर गुन्हा दाखल केला. अधिकाऱ्यांनी सांगितले की, जप्त केलेलं सोनं १९६२ च्या सीमाशुल्क कायद्यांतर्गत जप्त करण्यात आले आहे. या कायद्यानुसार, सोनं किंवा मौल्यवान वस्तू जाहीर न करता देशात आणणे किंवा बाहेर नेणे हा गंभीर गुन्हा मानला जातो. आता या प्रकरणात पुढील तपास केला जात असून ही महिला कोणत्याही तस्करी टोळीशी संबंधित आहे की नाही? याची चौकशी अधिकारी करत आहेत.