नवी दिल्ली : लंडन येथे सुरू असलेल्या FIDE वर्ल्ड रॅपिड अँड ब्लिट्झ टीम चॅम्पियनशिप स्पर्धेत भारतीय बुद्धिबळपटू दिव्या देशमुखने कमाल केली. दिव्याने पहिल्या क्रमांकाच्या होउ यिफानला हरवले. या कामगिरीसाठी पंतप्रधान मोदींनी दिव्याचे अभिनंदन केले. दिव्याने एक्स पोस्ट करत पंतप्रधान मोदींचे आभार मानले.
Thank you, Respected Sir 🙏 It is a great honor and encouragement for me to be recognized by the Prime Minister. https://t.co/wehjGc9b5X
— Divya Deshmukh (@DivyaDeshmukh05) June 19, 2025
संयम आणि दृढनिश्चयाने दिव्याने होउ यिफानचा पराभव केला. या कामगिरीसाठी दिव्याचे अभिनंदन असे पंतप्रधान मोदींनी त्यांच्या शुभेच्छा संदेशात नमूद केले आहे. तर पंतप्रधानांकडून सन्मानित होणे खूप सन्मानाचे आणि प्रेरणादायी असल्याचे दिव्याने तिच्या एक्स पोस्टमध्ये नमूद केले आहे.
नागपूरच्या १९ वर्षीय दिव्याने रुक-व्हर्सेस-बिशपच्या तणावपूर्ण अंतिम सामन्यात ७४ चालींमध्ये विजय मिळवण्यासाठी तिची प्रबळ इच्छाशक्ती आणि रणनीतिक कौशल्य दाखवले. दिव्याची कामगिरी बुद्धिबळ जगतात चर्चेचा विषय झाली आहे.
दिव्याने हेक्सामाइंड बुद्धिबळ क्लबच्यावतीने खेळत FIDE वर्ल्ड रॅपिड अँड ब्लिट्झ टीम चॅम्पियनशिप स्पर्धेत पहिल्या क्रमांकाच्या होउ यिफानला हरवले. दिव्याच्या कामगिरीमुळे अखेर ती ज्या संघाची सदस्य होती त्या संघाने ब्लिट्झमध्ये कांस्यपदक आणि रॅपिड स्वरूपात रौप्यपदक मिळवले. तिच्या वैयक्तिक पदकांमध्ये सांघिक रौप्य (रॅपिड), सांघिक कांस्य (ब्लिट्झ) आणि वैयक्तिक कांस्यपदक यांचा समावेश आहे. दिव्याने पहिल्यांदाच आंतरराष्ट्रीय पातळीवर खेळताना उल्लेखनीय कामगिरी केली.