कठुआ: सध्या सोशल मिडियावर एक क्युट व्हिडिओ भाव खातोय. जम्मू-काश्मीरच्या (J&K) कठुआ जिल्ह्यातील लोहाई-मल्हार गावच्या मुलीने पंतप्रधान नरेंद्र मोदी यांना आवाहन केलंय. तिचं हे गोड आवाहन पाहून तुम्हीही तिच्या प्रेमात पडाल. पण तिचं आवाहन जरी गोड असलं तरी ते तितकचं गंभीर आहे.

फेसबुकवर व्हायरल झालेल्या या व्हिडिओमध्ये दिसणारी विद्यार्थिनी पाच मिनिटांच्या या व्हिडिओमध्ये संपूर्ण शाळेची दयनीय अवस्था मांडते. संपूर्ण शाळेभोवती फेरफटका मारून ती त्या शाळेची खराब अवस्था, तुटलेले फरशी, चिखल, कार्यालय आणि शाळेचं स्वच्छतागृह इत्यादी गोष्टी क्रमाने दाखवते. हे सर्व दाखवून झाल्यावर ती म्हणते, “मोदीजी, तुम्ही संपूर्ण देशाचे ऐकता. माझे पण ऐका आणि आमची ही शाळा चांगली बनवा, खूप सुंदर शाळा बनवा म्हणजे आम्हाला असे खाली बसावे लागणार नाही. जेणेकरून आमचा ड्रेस खराब होणार नाही आणि आम्हाला चांगला अभ्यास करता येईल.” मुलीचा हा व्हिडीओ सध्या जोरदार व्हायरल होत आहे. एका हिंदी वेबसाईटने याबाबतचे वृत्त दिले आहे.