Home महाराष्ट्र नाशिक Nandur Madhmeshwar Bird Sanctuary : नांदूरमध्यमेश्वरमध्ये विदेशी पाहुण्याची एन्ट्री ! सोनेरी डोळ्यांचा ‘टफ्टेड डक’ ठरतोय आकर्षण

Nandur Madhmeshwar Bird Sanctuary : नांदूरमध्यमेश्वरमध्ये विदेशी पाहुण्याची एन्ट्री ! सोनेरी डोळ्यांचा ‘टफ्टेड डक’ ठरतोय आकर्षण

0
Nandur Madhmeshwar Bird Sanctuary : नांदूरमध्यमेश्वरमध्ये विदेशी पाहुण्याची एन्ट्री ! सोनेरी डोळ्यांचा ‘टफ्टेड डक’ ठरतोय आकर्षण

नाशिक : युरोपियन सायबेरिया आणि आइसलँडच्या अतिथंड प्रदेशातून हजारो किलोमीटरचा प्रवास करत सोनेरी-पिवळे डोळे आणि डोक्यावर आकर्षक तुरा असलेला दुर्मिळ दिसणारा ‘टफ्टेड डक’ (Tufted Duck) नांदूरमध्यमेश्वर पक्षी अभयारण्यात दाखल झाला आहे. हिवाळी स्थलांतराच्या हंगामात या विदेशी पाहुण्याचे आगमन झाल्याने पक्षीप्रेमी आणि निसर्ग अभ्यासकांमध्ये उत्सुकता निर्माण झाली आहे.

गडद काळ्या रंगाचे चमकदार पंख, उठावदार सोनेरी-पिवळे डोळे आणि डोक्याच्या मागील बाजूस असलेला मुकुटासारखा तुरा यामुळे टफ्टेड डक इतर पक्ष्यांपेक्षा वेगळा ठरतो. त्याचे आकर्षक रूप सध्या नांदूरमध्यमेश्वरच्या पाणथळ परिसरातील पक्षीनिरीक्षकांचे लक्ष वेधून घेत आहे.

पाण्याखाली डुबकी मारून शोधतो अन्न

टफ्टेड डक हा उत्कृष्ट जलपक्षी असून पाण्यात डुबकी मारून अन्न मिळवण्यात तो तरबेज आहे. पाण्याच्या तळाशी जाऊन शंख-शिंपले, लहान जलचर आणि इतर खाद्यपदार्थ शोधून तो आपली भूक भागवतो. धोका जाणवल्यास क्षणात पाण्याखाली डुबकी मारून काही अंतरावर पुन्हा पाण्याबाहेर येण्याची त्याची खासियत आहे. त्यामुळे त्याचे निरीक्षण करणे पक्षीनिरीक्षकांसाठी एक वेगळाच अनुभव ठरत आहे.

https://www.prahaar.in/2026/11/17/nashik-crimeshocking-case-of-ai-deepfake-uncovered-in-nashik-using-a-girls-exact-face-and-voice-the-perpetrators/

स्थलांतरित पक्ष्यांसाठी नांदूरमध्यमेश्वर महत्त्वाचे केंद्र

नांदूरमध्यमेश्वर पाणथळ क्षेत्र हे स्थलांतरित पक्ष्यांसाठी महत्त्वाचे अधिवासस्थान म्हणून ओळखले जाते. हिवाळ्याच्या काळात विविध देशांतून हजारो पक्षी या परिसरात दाखल होतात. त्यांच्या आगमनामुळे येथील जैवविविधतेत भर पडत असून पक्षीप्रेमींसाठी हे ठिकाण आकर्षणाचे केंद्र बनले आहे.

नांदूरमध्यमेश्वर वन्यजीव अभयारण्याचे वनपरिक्षेत्र अधिकारी हिरालाल चौधरी यांनी पक्षीप्रेमींना या सोनेरी डोळ्यांच्या विदेशी पाहुण्याचे निरीक्षण करण्यासाठी अभयारण्याला भेट देण्याचे आवाहन केले आहे. मात्र, पक्षीनिरीक्षण करताना शांतता राखावी, पक्ष्यांना त्रास होईल असे वर्तन टाळावे आणि त्यांच्या नैसर्गिक अधिवासाचे संरक्षण करावे, असेही त्यांनी सांगितले.निसर्गाच्या या अनोख्या सोहळ्यात टफ्टेड डकच्या आगमनामुळे नांदूरमध्यमेश्वरच्या पक्षीवैभवात आणखी एका आकर्षक पाहुण्याची भर पडली आहे.

LEAVE A REPLY

Please enter your comment!
Please enter your name here