देशातील आधुनिक आणि वेगवान रेल्वे सेवांपैकी एक म्हणून ओळखल्या जाणाऱ्या वंदे भारत एक्सप्रेसबाबत सुरक्षेच्या दृष्टीने गंभीर प्रकार समोर आला आहे. झारखंडमधील हटिया येथून उत्तर प्रदेशातील झाशीच्या दिशेने जाणारी रिकामी वंदे भारत ट्रेन तब्बल 463 किलोमीटरचा प्रवास डब्यांचे ब्रेक प्रभावीपणे काम करत नसतानाही करत राहिली. विशेष म्हणजे, ट्रेनमधील ब्रेकमध्ये बिघाड असल्याची माहिती लोको पायलटने संबंधित रेल्वे अधिकाऱ्यांना दिली होती. मात्र, त्यानंतरही ट्रेनचा प्रवास सुरू ठेवण्यात आला. या प्रकाराची गंभीर दखल घेत दक्षिण पूर्व रेल्वेने चौकशीचे आदेश दिले आहेत.(BrakeFailure)

नेमकी घटना काय घडली?

ही घटना 24 ऑक्टोबर रोजी घडली आहे. झारखंडमधील हटिया येथून वंदे भारतची रिकामी चेअर कार रेक उत्तर प्रदेशातील झाशी येथे हलवण्यात येत होती. यासाठी मालगाडीच्या इंजिनाचा वापर करण्यात आला होता. नियमानुसार, मालगाडीच्या इंजिनाची ब्रेकिंग यंत्रणा आणि वंदे भारतच्या डब्यांची ब्रेकिंग यंत्रणा एकमेकांशी योग्य प्रकारे जोडणे आवश्यक होते. मात्र, ही प्रक्रिया योग्य प्रकारे पूर्ण करण्यात आली नसल्याचा संशय आहे.(VandeBharatExpress)

https://www.prahaar.in/2026/11/15/holy-relics-of-lord-buddha-arrive-in-namsai-devotees-can-have-darshan-until-20-november/

लोको पायलटने दिली होती तक्रार

हटिया येथून ट्रेन रवाना झाल्यानंतर लोको पायलटने ब्रेकची तपासणी केली. त्यावेळी ट्रेनची ब्रेकिंग क्षमता अत्यंत कमी असल्याचे त्याच्या लक्षात आले. रांची स्थानकावर पोहोचल्यानंतर त्याने सेक्शन कंट्रोलर आणि ट्रॅक्शन लोको कंट्रोलर यांच्याकडे ब्रेक व्यवस्थित काम करत नसल्याची लेखी तक्रार केली. मात्र, या तक्रारीनंतरही ट्रेनला पुढच्या प्रवासासाठी परवानगी देण्यात आली. यानंतर मुरी स्थानकावर दुसऱ्या लोको पायलटने ट्रेनची जबाबदारी स्वीकारली. त्यानेही ब्रेकमध्ये बिघाड असल्याची माहिती संबंधित अधिकाऱ्यांना दिली आहे. विशेष म्हणजे, ब्रेक पाइपमधील दाब कमी करूनही डब्यांचे ब्रेक लागत नसल्याचे त्याने स्पष्ट केले आहे. तरीदेखील ट्रेनचा प्रवास सुरूच राहिला.

https://www.prahaar.in/2026/11/15/free-tablets-for-25-lakh-youth-1-lakh-government-jobs-announced-cm-yogi-adityanath-questions-samajwadi-party-tenure/

463 किलोमीटरचा प्रवास कसा झाला?

उत्तर प्रदेशातील चंदौली जिल्ह्यातील दीनदयाळ उपाध्याय (DDU) स्थानकावर ट्रेन पोहोचल्यानंतर तिची तपासणी करण्यात आली. त्यावेळी सर्व डब्यांची ब्रेकिंग यंत्रणा आयसोलेट म्हणजेच मुख्य ब्रेकिंग यंत्रणेपासून वेगळी असल्याचे आढळले. त्यामुळे डब्यांचे ब्रेक कार्यरत नव्हते. परिणामी, या ट्रेनने सुमारे 463 किलोमीटरचा प्रवास केवळ मालगाडीच्या इंजिनचे ब्रेक आणि रीजेनरेटिव्ह ब्रेकिंग यंत्रणेच्या मदतीने पूर्ण केला. डब्यांच्या ब्रेकिंग यंत्रणेचा प्रभावी वापर झालाच नव्हता. सुदैवाने या प्रवासादरम्यान कोणतीही दुर्घटना घडली नाही.(IndianRailways)

रेल्वे प्रशासनाकडून चौकशीचे आदेश

या प्रकारानंतर दक्षिण पूर्व रेल्वेने 7 नोव्हेंबर रोजी चौकशीचे आदेश जारी केले. रांची विभागाच्या विभागीय रेल्वे व्यवस्थापकांना (DRM) या संपूर्ण घटनेची सविस्तर चौकशी करण्याचे निर्देश देण्यात आले आहेत. प्राथमिक तपासात कोच आणि वॅगन विभागातील कर्मचारी, सेक्शन कंट्रोलर, ट्रॅक्शन कंट्रोलर तसेच ट्रेन चालवणाऱ्या कर्मचाऱ्यांच्या कामकाजातील चुका समोर आल्या आहेत. ट्रेन रवाना करण्यापूर्वी डब्यांचे ब्रेक प्रत्यक्ष तपासण्यात आले नव्हते. तसेच लोको पायलटच्या तक्रारीनंतरही योग्य ती कारवाई करण्यात आली नसल्याचे चौकशी आदेशात नमूद करण्यात आले आहे. आता या प्रकरणात नेमकी चूक कुणाची होती, ट्रेनला पुढच्या प्रवासाची परवानगी कशी देण्यात आली आणि सुरक्षा नियमांचे पालन का झाले नाही, याची सविस्तर चौकशी केली जाणार आहे. भविष्यात अशा घटना टाळण्यासाठी आवश्यक सुधारात्मक उपाययोजना करण्याचे निर्देशही रेल्वे प्रशासनाने दिले आहेत.(RailwaySafety)