नवी दिल्ली: महाराष्ट्रातील आंतरराष्ट्रीय बुद्धिबळपटू विदित संतोष गुजराती आणि दिव्या जितेंद्र देशमुख यांना अर्जुन पुरस्कार, नेमबाजी प्रशिक्षक नेहा नंदकुमार चौहान यांना द्रोणाचार्य पुरस्कार, तर पुण्यातील आर्मी पॅरालिम्पिक नोड या संस्थेला राष्ट्रीय क्रीडा प्रोत्साहन पुरस्काराने गौरविण्यात आले आहे. बुद्धिबळातील आंतरराष्ट्रीय यश, नेमबाजीतील उत्कृष्ट प्रशिक्षण आणि दिव्यांग सैनिकांच्या क्रीडा पुनर्वसनातील उल्लेखनीय योगदानाच्या जोरावर महाराष्ट्राने राष्ट्रीय क्रीडा पुरस्कार 2025 मध्ये आपली ठळक छाप उमटवली आहे. राष्ट्रपती द्रौपदी मुर्मू यांच्या हस्ते राष्ट्रपती भवनातील गणतंत्र मंडप येथे आज आयोजित विशेष समारंभात हे पुरस्कार प्रदान करण्यात आले.

नाशिकचा आंतरराष्ट्रीय बुद्धिबळपटू विदित संतोष गुजराती याने बुद्धिबळ क्षेत्रात सातत्यपूर्ण आणि उल्लेखनीय कामगिरी केली आहे. बुडापेस्ट येथे झालेल्या 45 व्या फिडे बुद्धिबळ ऑलिंपियाड 2024 मध्ये सुवर्णपदक, हांगझाऊ आशियाई क्रीडा स्पर्धेत रौप्यपदक त्याने मिळवले आहे तसेच आयल ऑफ मॅन येथे झालेल्या फिडे ग्रँड स्विस 2023 स्पर्धेत सुवर्णपदक मिळविण्याची कामगिरी त्याने केली आहे. त्याच्या या आंतरराष्ट्रीय यशाची दखल घेत त्याला अर्जुन पुरस्कार राष्ट्रपती द्रौपदी मुर्मू यांच्या हस्ते प्रदान करण्यात आला आहे.

नागपूरची युवा आंतरराष्ट्रीय बुद्धिबळपटू दिव्या जितेंद्र देशमुख हिनेही आपल्या उल्लेखनीय कामगिरीने महाराष्ट्राचा गौरव वाढविला आहे. 45व्या फिडे बुद्धिबळ ऑलिंपियाड 2024 मध्ये दोन सुवर्णपदके, अलमाटी येथे झालेल्या 2023 च्या आशियाई खंडीय महिला बुद्धिबळ स्पर्धेत सुवर्णपदक आणि 2022 मध्ये दिल्ली येथे झालेल्या स्पर्धेत कांस्यपदक मिळविण्याची कामगिरी तिने केली आहे. तिच्या या यशस्वी क्रीडा प्रवासाचा गौरव अर्जुन पुरस्काराने करण्यात आला.

https://www.prahaar.in/2026/11/13/cyclone-alert-the-threat-of-a-cyclone-returns-to-the-state-and-the-country-several-states-placed-on-alert/

नेहा चव्हाण यांना द्रोणाचार्य पुरस्कार

महाराष्ट्रातील प्रशिक्षक नेहा नंदकुमार चव्हाण यांना नेमबाजी क्षेत्रातील उत्कृष्ट प्रशिक्षण कार्य आणि खेळाडूंच्या कौशल्य विकासासाठी दिलेल्या योगदानाबद्दल द्रोणाचार्य पुरस्कार प्रदान करण्यात आला. त्यांच्या मार्गदर्शनाखाली खेळाडूंना राष्ट्रीय व आंतरराष्ट्रीय स्तरावर कामगिरी करण्यासाठी मिळालेल्या प्रोत्साहनाची या पुरस्काराद्वारे दखल घेण्यात आली आहे.

दिव्यांग सैनिकांच्या क्रीडा पुनर्वसनात पुण्याच्या आर्मी पॅरालिम्पिक नोडची महत्त्वपूर्ण कामगिरी

पुण्यातील आर्मी पॅरालिम्पिक नोड या संस्थेला जी देशसेवेदरम्यान दिव्यांगत्व आलेल्या सैनिकांचे पुनर्वसन करून त्यांना पॅरा क्रीडा प्रकारांचे शास्त्रशुद्ध प्रशिक्षण देते त्यांना राष्ट्रीय क्रीडा प्रोत्साहन पुरस्कार 2025 प्रदान करण्यात आला. या संस्थेने 2017 मध्ये स्थापन झाल्यापासून दिव्यांग सैनिकांना क्रीडाक्षेत्रात नवी दिशा देण्याचे महत्त्वपूर्ण कार्य केले आहे. संस्थेच्या 150 हून अधिक खेळाडूंनी पॅरिस पॅरालिम्पिक 2024 आणि हांगझाऊ आशियाई पॅरा क्रीडा स्पर्धांसह विविध राष्ट्रीय व आंतरराष्ट्रीय स्पर्धांमध्ये 300हून अधिक पदके मिळविली आहेत. संस्थेच्या वतीने लेफ्टनंट कर्नल दलजीत सिंह यांनी हा पुरस्कार स्वीकारला.

तसेच या सोहळ्यात ॲथलेटिक्स प्रशिक्षक परवीर सिंह आणि बॉक्सिंग प्रशिक्षक छोटेलाल यादव यांना द्रोणाचार्य पुरस्कार, तर कुस्ती प्रशिक्षक वीरेंद्र कुमार आणि बॉक्सिंग प्रशिक्षक धर्मेंद्र सिंह यादव यांना द्रोणाचार्य पुरस्कार (जीवनगौरव) प्रदान करण्यात आला. यावेळी साहसी क्रीडा क्षेत्रातील उल्लेखनीय कामगिरीसाठी तेनझिंग नोर्गे राष्ट्रीय साहस पुरस्कार २०२४ चेही वितरण करण्यात आले. लडाखचे स्कालजांग रिग्झिन आणि हिमाचल प्रदेशच्या बलजीत कौर यांना भूमी साहस पुरस्कार, पश्चिम बंगालचे रीमो साह यांना जलीय साहस पुरस्कार, तर उत्तराखंडचे शिव प्रसाद चमोली यांना तेनझिंग नोर्गे जीवनगौरव साहस पुरस्कार प्रदान करण्यात आला.