पाटणा : बिहारमधील वाहतुकीची व्यवस्था अधिक वेगवान आणि सुलभ करणाऱ्या एका अत्यंत महत्त्वाच्या प्रकल्पाबाबत मोठी घोषणा करण्यात आली आहे. कच्ची दरगाह ते बिदुपूर दरम्यान बांधण्यात आलेल्या या नव्या सहा पदरी (सिक्स लेन) पुलाचे नामकरण बिहारचे मुख्यमंत्री नीतीश कुमार (Nitish Kumar) यांच्या नावावरून ‘नीतीश सेतू’ असे करण्याचा निर्णय राज्य सरकारने घेतला आहे. राज्याचे उपमुख्यमंत्री सम्राट चौधरी (Samrat Chaudhary) यांनी एका पत्रकार परिषदेत ही घोषणा केली आहे. येत्या २१ नोव्हेंबर रोजी देशाचे पंतप्रधान नरेंद्र मोदी यांच्या हस्ते या पुलाचे दिमाखात लोकार्पण केले जाणार आहे.

राजापाकर येथे मुख्य सोहळा.

आदरणीय प्रधानमंत्री श्री @narendramodi जी का 21 नवंबर को बिहार आगमन हो रहा है। इस अवसर पर माननीय प्रधानमंत्री जी कच्ची दरगाह-राघोपुर-बिदुपुर छह लेन पुल, जिसका नामकरण राज्य सरकार द्वारा ‘नीतीश सेतु’ किया गया है, राष्ट्र को समर्पित करेंगे।

इसके साथ ही माननीय प्रधानमंत्री जी राजापाकर में आयोजित कार्यक्रम के दौरान विभिन्न जनोपयोगी एवं विकासात्मक योजनाओं का शिलान्यास और उद्घाटन भी करेंगे।

— Samrat Choudhary (@samrat4bjp) November 13, 2026

पंतप्रधान नरेंद्र मोदी यांच्या नियोजित बिहार दौऱ्याची जय्यत तयारी सध्या प्रशासनाकडून सुरू आहे. या दौऱ्यादरम्यान वैशाली जिल्ह्यातील राजापाकर येथे एका भव्य कार्यक्रमाचे आयोजन करण्यात आले आहे. याच मुख्य सोहळ्याच्या मंचावरून पंतप्रधान मोदी या ऐतिहासिक आणि भव्य पुलाचे औपचारिक उद्घाटन करून तो पूर्णपणे जनतेच्या सेवेत दाखल करणार आहेत.

पाटणा ते उत्तर बिहारचा प्रवास होणार सोपा

https://www.prahaar.in/2026/11/13/ind-vs-nz-4th-odi-india-scored-zero-runs-and-lost-three-wickets-in-the-very-first-over-rohit-and-virat-out-on-duck/

हा नवीन सहा पदरी पूल पाटण्यातील कच्ची दरगाह परिसराला थेट वैशाली जिल्ह्यातील बिदुपूर (राघोपूर भाग) क्षेत्राशी जोडणार आहे. या प्रकल्पाच्या पूर्णत्वामुळे राजधानी पाटणा आणि उत्तर बिहारमधील दळणवळणाचा प्रश्न खूप मोठ्या प्रमाणावर सुटणार आहे. या मार्गावरून प्रवास करणाऱ्या वाहनचालकांचा वेळ आणि अंतर दोन्ही वाचणार असून, नागरिकांना रोजच्या नकोशा वाटणाऱ्या भीषण वाहतूक कोंडीतून मोठा दिलासा मिळणार आहे. तसेच, या भागातील व्यावसायिक वाहतूक आणि दळणवळण जलद झाल्यामुळे राज्याच्या व्यापारी घडामोडींनाही मोठी गती मिळण्याची शक्यता आहे.

बिहारला मिळणार इतरही विकासात्मक प्रकल्पांची भेट

फक्त ‘नीतीश सेतू’च्या उद्घटनापुरताच हा दौरा मर्यादित नसून, वैशालीच्या राजापाकर येथील या मुख्य कार्यक्रमातून पंतप्रधान नरेंद्र मोदी यांच्या हस्ते बिहारच्या सर्वांगीण प्रगतीसाठी इतरही अनेक महत्त्वाच्या पायाभूत सुविधा आणि जनोपयोगी प्रकल्पांचे भूमिपूजन व लोकार्पण पार पडणार आहे. या बहुप्रतिक्षित प्रकल्पांमुळे आणि नव्या विकासकामांच्या अर्पण सोहळ्यामुळे आगामी काळात बिहारच्या विकासाला एक नवी आणि सकारात्मक दिशा मिळणार आहे.