रांची : झारखंडमधील हजारीबाग जिल्ह्यातील चौपारण पोलीस ठाण्याच्या हद्दीत असलेल्या दनुआ घाटीत सोमवारी एक भीषण रस्ते अपघात झाला. या दुर्घटनेत 5 जणांचा बळी गेला असून 14 जण जखमी झाले आहेत. मिळालेल्या माहितीनुसार, हे सर्व प्रवासी गिरिडीह जिल्ह्यातील बगोदर पोलीस ठाण्याच्या हद्दीतील बिहारो आणि सलैया गावातील रहिवासी होते. बगोदर येथील अटका गावातून एका मृतदेहावर अंत्यसंस्कार करण्यासाठी हे सर्वजण एका प्रवासी वाहनाने वाराणसीच्या दिशेने निघाले होते. मात्र, प्रवास सुरू असताना जीटी मार्गावरील दनुआ घाटीत मागून आलेल्या एका भरधाव टँकरने त्यांच्या वाहनाला अत्यंत जोरदार धडक दिली. धडक इतकी भीषण होती की, वाहनाचे मोठे नुकसान झाले आणि प्रवाशांमध्ये एकच आक्रोश व हाहाकार उडाला. या अपघातात 5 जणांचा जागीच मृत्यू झाला, तर 14 जण गंभीर जखमी झाले.

https://www.prahaar.in/2026/11/09/madhya-pradesh-massive-fire-tragedy-during-diwali-12-dead-from-2-families-unfortunate-accident/

स्थानिकांची मदत आणि प्रशासकीय कारवाई

अपघातानंतर घटनास्थळी मोठी गर्दी जमली. स्थानिक नागरिकांनी प्रसंगावधान दाखवत तात्काळ मदतकार्य सुरू केले आणि जखमींना उपचारासाठी रुग्णालयात हलवण्यात मदत केली. घटनेची माहिती मिळताच चौपारण पोलीस ठाण्याचे प्रभारी पंकज कुमार आपल्या पथकासह घटनास्थळी दाखल झाले आणि त्यांनी बचावकार्यास वेग दिला. चौपारण पोलिसांनी 5 जणांच्या मृत्यूच्या वृत्ताला दुजोरा दिला असून, मृतांचे मृतदेह पुढील कार्यवाहीसाठी हजारीबाग वैद्यकीय महाविद्यालयात पाठवण्यात आले आहेत. पोलीस सध्या टँकर चालकाचा शोध घेत असून अपघाताच्या नेमक्या कारणाचा कसून तपास करत आहेत. एकाच गावातील 5 जणांचा मृत्यू झाल्याची बातमी समजताच बिहारो आणि सलैया गावांवर शोककळा पसरली असून नातेवाईकांचा टाहो पाहून उपस्थितांचेही डोळे पाणावले.