बंगळुरू: विमान प्रवाशांच्या सुरक्षेचा आणि हक्कांचा प्रश्न पुन्हा एकदा ऐरणीवर आला आहे. 5 नोव्हेंबर 2026 रोजी बंगळूरच्या केम्पेगौडा आंतरराष्ट्रीय विमानतळावर (Kempegowda International Airport) एका धक्कादायक प्रकार घडला. शेवटच्या क्षणी विमान रद्द करण्यात आल्यामुळे संतप्त झालेल्या 35 हून अधिक प्रवाशांचा रोष अखेर अनावर झाला. नियोजित उड्डाणाच्या अवघ्या 30 मिनिटे आधी विमान रद्द केल्याची घोषणा झाल्यामुळे विमानतळावर एकच गदारोळ उडाला आणि प्रवासी व स्पाईसजेटच्या (SpiceJet) कर्मचाऱ्यांमध्ये तुफान हाणामारी व वाद झाल्याचे समोर आले आहे.
सोशल मीडियावर व्हायरल झालेल्या वृत्तानुसार, अचानक उड्डाण रद्द झाल्यामुळे प्रवाशांचे प्रचंड हाल झाले. पर्यायी व्यवस्था किंवा कसलीही पूर्वकल्पना न देता अचानक तिकिटे रद्द करून वाऱ्यावर सोडल्याचा गंभीर आरोप प्रवाशांनी एअरलाइनवर केला आहे. या गोंधळात संतापलेली एक महिला प्रवासी एअरलाइन कर्मचारी आणि सीआयएसएफ (CISF) जवानांवर प्रचंड संतापली आणि त्यांच्यावर ओरडत असल्याचे व्हिडिओमध्ये दिसत आहे. वादावादी विकोप्याला गेल्यानंतर त्या महिलेने थेट स्पाइसजेटच्या एका महिला कर्मचाऱ्याला शारीरिक मारहाण केल्याचा गंभीर आरोपही करण्यात आला आहे.
A heated argument broke out between SpiceJet staff and passengers at Bengaluru International Airport after more than 35 passengers were allegedly left stranded following last-minute flight cancellations. Angry passengers were seen hurling abuses and arguing with the staff. https://t.co/lCRgQgrhA5
— IndianLafda (@IndianLafdaa) November 6, 2026
या अचानक झालेल्या प्रकारामुळे विमानतळावर अभूतपूर्व तणावाचे वातावरण निर्माण झाले होते. संतप्त प्रवासी एअरलाइन कर्मचाऱ्यांना जास्तीत जास्त स्पष्टीकरण मागण्यासाठी घेराव घालून वाद घालताना दिसत होते. परिस्थिती हाताबाहेर जात असल्याचे पाहून सुरक्षा कर्मचाऱ्यांना आणि सीआयएसएफच्या जवानांना तात्काळ मध्यस्थी करावी लागली. जवानांनी गर्दीला शांत करण्याचा आणि वाढता संघर्ष नियंत्रित करण्याचा प्रयत्न केला, परंतु तोपर्यंत या घटनेचा व्हिडिओ सोशल मीडियावर वाऱ्यासारखा पसरला होता आणि सर्वत्र एकच खळबळ उडाली होती.
या घटनेमुळे विमान कंपन्यांकडून प्रवाशांच्या वेळेचा आणि भावनांचा केला जाणारा खेळ पुन्हा एकदा चव्हाट्यावर आला आहे. वारंवार शेवटच्या क्षणी विमाने रद्द करणे किंवा उशीर करणे यामुळे सामान्य प्रवाशांना नाहक मनस्ताप सहन करावा लागतो. या प्रकरणी संतप्त प्रवाशांनी एअरलाइन प्रशासनाच्या ढिसाळ कारभारावर तीव्र संताप व्यक्त केला असून, झालेल्या आर्थिक व मानसिक नुकसानाची भरपाई मिळण्याची आणि जबाबदार घटकांवर कारवाईची मागणी केली आहे. या घटनेमुळे स्पाईसजेटच्या कारभारावर मोठे प्रश्नचिन्ह निर्माण झाले असून विमानतळ परिसरात काही काळ सुरक्षेचा मोठा प्रश्न निर्माण झाला होता.