मुंबई: भारतीय शेअर बाजारात शुक्रवारी दिवाळीच्या तोंडावर अभूतपूर्व आणि तुफान तेजी पाहायला मिळाली. खरेदीचा जोरदार जोर राहिल्याने देशांतर्गत बेंचमार्क इंडेक्समध्ये 2 टक्क्यांहून अधिक मोठी वाढ नोंदवली गेली. या महा-तेजीमुळे मुंबई शेअर बाजाराचा निर्देशांक सेन्सेक्सने (Sensex) थेट 81,000 चा टप्पा ओलांडला, तर राष्ट्रीय शेअर बाजाराचा निफ्टी 50 (Nifty 50) अंकांनी उसळी घेत महत्त्वाच्या असलेल्या 25,000 च्या मनोवैज्ञानिक पातळीवर जाऊन पोहोचला.

व्यवसाय संपताना बीएसई सेन्सेक्स तब्बल 1,718.02 अंकांनी (2.17 टक्के) मजबूत होत 81,028.02 अंकांवर बंद झाला. तर दुसरीकडे, एनएसई निफ्टी 50 ने 493.75 अंकांची (2.01 टक्के) घसघशीत वाढ नोंदवत 25,030.35 अंकांवर मजल मारली. दिवसभरातील सत्रात सेन्सेक्सने 79,016.05 च्या नीचांकी पातळीवरून थेट 81,028 चा उच्चांक गाठला, तर निफ्टीनेही 24,388 वरून झेप घेत 25,000 ची सीमा पार केली.

https://www.prahaar.in/2026/11/06/dicgc-scheme-how-safe-is-money-kept-in-a-bank-insurance-cover-up-to-rs-5-lakh-available-in-one-bank-account-know-about-rbis-dicgc-scheme/

या अचानक आलेल्या महा-तेजीमागे अनेक कारणे असल्याचे बोलले जात आहे. मागील काही दिवसांत झालेल्या घसरणीमुळे खालावलेले बाजारभाव पाहता गुंतवणूकदारांनी ‘बार्गेन हंटिंग’ करत ब्लू-चिप आणि हेवीवेट शेअर्समध्ये मोठ्या प्रमाणावर खरेदी केली. याशिवाय, जागतिक पातळीवरील सकारात्मक संकेत, बँकिंग क्षेत्रातील पुनरुज्जीवन आणि आगामी रविवारी होणाऱ्या ‘दिवाळी मुहूर्त ट्रेडिंग’च्या (Diwali Muhurat Trading) उत्साहाने बाजारात नवा जोश भरला. बाजारातील या अचानक आलेल्या तेजीमुळे मंदीवाल्यांचे (Bears) धाबे दणाणले असून त्यांना शॉर्ट कव्हरिंगचा मोठा फटका बसला.

या तेजीमध्ये परदेशी संस्थागत गुंतवणूकदारांची (FII) भूमिका अत्यंत महत्त्वाची ठरली. गुरुवारी एफआयआयने तब्बल 14,975 कोटी रुपयांचे शेअर्स खरेदी केले, जी गेल्या जवळपास 6 वर्षांतील एकाच सत्रातील सर्वात मोठी खरेदी ठरली आहे. यामुळे बाजारातील ढासळलेला आत्मविश्वास पुन्हा दुप्पट झाला आहे. तसेच, महिंद्रा अँड महिंद्रा सारख्या दिग्गज कंपन्यांच्या सप्टेंबर तिमाहीतील दमदार निकालांमुळे (25 टक्के नफा वाढ) कॉर्पोरेट क्षेत्राची ताकद दिसून आली, ज्याचा फायदा ऑटो, फायनान्स आणि आयटी क्षेत्राला मिळाला.

तांत्रिकदृष्ट्या निफ्टीने 25,000 चा टप्पा ओलांडणे बाजारासाठी अत्यंत शुभ संकेत मानले जात आहेत. मात्र, आगामी काळात भू-राजकीय तणाव, कच्च्या तेलाच्या किमतींमधील फेरबदल आणि नफा वसुलीचा (Profit Booking) धोका कायम असणार आहे. असे असले तरी, सध्याच्या या तुफान तेजीमुळे गुंतवणूकदारांमध्ये आनंदाचे वातावरण असून दिवाळीचा सण खऱ्या अर्थाने आनंददायी ठरला आहे.