National News: शुक्रवारी सकाळी देशातील दोन वेगवेगळ्या राज्यांमध्ये भूकंपाचे धक्के जाणवले. हिमाचल प्रदेशातील चंबा आणि तेलंगणातील नारायणपेट येथे भूकंपाची नोंद झाली. राष्ट्रीय भूकंपशास्त्र केंद्राच्या (NCS) माहितीनुसार, या भूकंपांची तीव्रता अनुक्रमे 3.2 आणि 2.5 इतकी होती. सुदैवाने, या घटनांमध्ये जीवितहानी किंवा मालमत्तेचे नुकसान झाल्याचे वृत्त नाही.

https://www.prahaar.in/2026/11/05/supreme-court-directives-devalued-show-cause-notice-issued-to-law-officer-and-assistant-commissioner/

तेलंगणातील नारायणपेटमध्ये 2.5 तीव्रतेचा भूकंप

राष्ट्रीय भूकंपशास्त्र केंद्राच्या माहितीनुसार, तेलंगणातील नारायणपेट येथे सकाळी 6 वाजून 16 मिनिटांनी भूकंपाची नोंद झाली. या भूकंपाची तीव्रता 2.5 होती. त्याचा केंद्रबिंदू जमिनीपासून 5 किलोमीटर खोलीवर होता. भूकंपाचे स्थान 16.452 अंश उत्तर अक्षांश आणि 77.414 अंश पूर्व रेखांश असे नोंदवण्यात आले.

हिमाचल प्रदेशातील चंबामध्ये 3.2 तीव्रतेचे धक्के

दरम्यान, हिमाचल प्रदेशातील चंबा येथे सकाळी 6 वाजून 59 मिनिटांनी भूकंप झाला. त्याची तीव्रता 3.2 मोजण्यात आली. या भूकंपाचा केंद्रबिंदू जमिनीपासून 15 किलोमीटर खोलीवर होता. त्याचे स्थान 32.719 अंश उत्तर अक्षांश आणि 76.123 अंश पूर्व रेखांश येथे नोंदवण्यात आले.

या दोन्ही भूकंपांची तीव्रता तुलनेने कमी होती. त्यामुळे सध्या कोणतीही जीवितहानी किंवा मालमत्तेचे नुकसान झाल्याची माहिती समोर आलेली नाही.

भूकंप कसा होतो?

पृथ्वीची अंतर्गत रचना मुख्यतः चार थरांमध्ये विभागलेली आहे. अंतर्गाभा, बाह्यगाभा, प्रावरण आणि कवच असे हे चार थर आहेत. पृथ्वीचा सर्वात बाहेरील कठीण भाग म्हणजे कवच. कवच आणि प्रावरणाचा वरचा कठीण भाग मिळून शिलावरण तयार होते.

शिलावरण अनेक लहान-मोठ्या भूविवर्तनिकी पट्ट्यांमध्ये विभागलेले आहे. हे पट्टे अतिशय मंद गतीने सतत हालचाल करत असतात. जेव्हा दोन पट्टे एकमेकांवर आदळतात, एकमेकांपासून दूर जातात किंवा एकमेकांच्या बाजूने सरकतात, तेव्हा त्यांच्यामध्ये ताण निर्माण होतो. हा ताण अचानक मुक्त झाल्यावर ऊर्जा बाहेर पडते आणि पृथ्वीचा पृष्ठभाग हादरतो. यालाच भूकंप म्हणतात.