जर्मन लक्झरी कार निर्माता मर्सिडीज-बेंझने भारतातील इलेक्ट्रिक प्रवासात मोठे पाऊल टाकले आहे. कंपनीने पुण्याजवळील चाकण येथील कारखान्यात नवीन इलेक्ट्रिक GLC चे स्थानिक उत्पादन सुरू केले आहे. या नव्या मॉडेलसह भारतात बनणारी ही पहिली मर्सिडीज कार ठरली आहे, जी कंपनीच्या नव्या पिढीच्या इलेक्ट्रिक प्लॅटफॉर्मवर आधारित आहे. या प्लॅटफॉर्मला MB.EA-M असे नाव देण्यात आले आहे. याच प्लॅटफॉर्मवर भविष्यातील अनेक इलेक्ट्रिक मॉडेल्स तयार केली जाणार आहेत. चाकण येथे झालेल्या उत्पादन सुरुवातीच्या कार्यक्रमाला महाराष्ट्राचे मुख्यमंत्री देवेंद्र फडणवीस उपस्थित होते. त्यांच्यासोबत मर्सिडीज-बेंझ एजीचे प्रमुख ओला कॅलेनियस आणि मुख्य तंत्रज्ञान अधिकारी डॉ. योर्ग बर्झर हेदेखील उपस्थित होते.
या कार्यक्रमात मर्सिडीज-बेंझने भारतासाठी आणखी 200 कोटी रुपयांच्या गुंतवणुकीची घोषणा केली. ही गुंतवणूक 2026 मध्ये उत्पादन क्षमता वाढवणे, डिजिटायझेशन आणि नव्या उत्पादनांच्या विकासासाठी वापरली जाणार आहे. या नव्या गुंतवणुकीसह भारतातील कंपनीची एकूण गुंतवणूक आता 3200 कोटी रुपयांवर पोहोचली आहे. भारतात कार्यरत असलेल्या लक्झरी कार कंपन्यांमध्ये ही सर्वाधिक गुंतवणूक असल्याचा दावा कंपनीने केला आहे.
711 किमी रेंज, फक्त 4.3 सेकंदात 100 चा वेग
नवीन इलेक्ट्रिक GLC 400 4MATIC मध्ये ड्युअल मोटर ऑल-व्हील ड्राइव्ह सिस्टीम देण्यात आली आहे. ही सिस्टीम 360 किलोवॅट म्हणजेच 489 हॉर्सपॉवरची शक्ती आणि 800 न्यूटन मीटर टॉर्क निर्माण करते. ही एसयूव्ही फक्त 4.3 सेकंदात 0 ते 100 किमी प्रतितास वेग गाठते. यामध्ये 94 kWh क्षमतेचा बॅटरी पॅक देण्यात आला आहे. ARAI ने प्रमाणित केलेल्या WLTP सायकलनुसार ही कार एका चार्जवर 711 किमी पर्यंत धावू शकते. ही रेंज या सेगमेंटमधील सर्वात मोठ्या रेंजपैकी एक मानली जात आहे.
View this post on Instagram
800 व्होल्ट तंत्रज्ञान आणि सुपरफास्ट चार्जिंग
इलेक्ट्रिक GLC मध्ये 800 व्होल्टचे अत्याधुनिक इलेक्ट्रिकल आर्किटेक्चर वापरण्यात आले आहे. यामुळे कार 330 kW पर्यंतच्या डीसी फास्ट चार्जिंगला सपोर्ट करते. आदर्श परिस्थितीत फक्त 10 मिनिटांच्या चार्जिंगमध्ये 303 किमी पर्यंतची रेंज मिळते, असा कंपनीचा दावा आहे. लांबच्या प्रवासासाठी हे तंत्रज्ञान खूप फायदेशीर ठरणार आहे. इलेक्ट्रिक GLC ही भारतातील पहिली मर्सिडीज एसयूव्ही आहे, ज्यामध्ये कंपनीची नवी मर्सिडीज-बेंझ ऑपरेटिंग सिस्टीम (MB.OS) देण्यात आली आहे. ही सॉफ्टवेअर-आधारित प्रणाली इंटेलिजंट नेव्हिगेशन, अॅडव्हान्स ड्रायव्हर असिस्टन्स सिस्टीम, ओव्हर-द-एअर अपडेट्स आणि वैयक्तिकृत अनुभव देते.
कारच्या आत 39.1 इंचाचा भव्य MBUX हायपरस्क्रीन देण्यात आला आहे. समोरच्या बाजूला 942 लाइट पिक्सेल असलेली प्रकाशमान ग्रिल लक्ष वेधून घेते. तसेच SKY CONTROL पॅनोरॅमिक छतामुळे केबिन अधिक मोकळे आणि प्रीमियम वाटते. गाडीच्या आत टिकाऊ आणि रिसायकल केलेल्या मटेरियलचा मोठ्या प्रमाणात वापर करण्यात आला आहे. चाकण प्लांटचे आणखी एक वैशिष्ट्य म्हणजे, इलेक्ट्रिक GLC ही पेट्रोल-डिझेल कार्सप्रमाणेच त्याच असेंब्ली लाइनवर तयार केली जात आहे. यामुळे कारखान्याची लवचिकता दिसून येते. प्लांटमध्ये एआय-आधारित उत्पादन प्रणाली, रोबोटिक्स आणि डिजिटल मॅन्युफॅक्चरिंग प्रक्रियांचा वापर केला जातो. मर्सिडीज-बेंझने इलेक्ट्रिक GLC 400 4MATIC ची किंमत 78.5 लाख रुपये (एक्स-शोरूम) ठेवली आहे. नोव्हेंबर 2026 च्या मध्यापासून ग्राहकांना डिलिव्हरी सुरू होणार आहे. बुकिंग सुरू झाल्यानंतर अवघ्या 36 तासांत या कारसाठी 550 पेक्षा जास्त लोकांनी इच्छा व्यक्त केली आहे. यावरून भारतात लक्झरी इलेक्ट्रिक कार्सना वाढती मागणी असल्याचे स्पष्ट होत आहे.
प्रमुख वैशिष्ट्ये
पॉवर : 489 hp
टॉर्क : 800 Nm
बॅटरी : 94 kWh
रेंज : 711 किमी पर्यंत
0-100 किमी : 4.3 सेकंद
चार्जिंग : 330 kW डीसी फास्ट चार्जिंग
किंमत : 78.5 लाख रुपये
एकूणच, स्थानिक उत्पादनामुळे किंमत स्पर्धात्मक राहण्यास मदत होणार असून, भारत हा मर्सिडीजसाठी महत्त्वाचा इलेक्ट्रिक बाजार ठरणार आहे.