मुंबई : ठाण्यातील उबाठा गटाचे विभागप्रमुख प्रदीप पूर्णेकर यांच्या हत्या प्रकरणावरून राजकीय वातावरण तापले असताना, या प्रकरणात शिवसेनेची बाजू प्रभावीपणे मांडली गेली नसल्याबद्दल खासदार श्रीकांत शिंदे यांनी पक्षाच्या प्रवक्त्यांकडे नाराजी व्यक्त केली. नंदनवन बंगल्यावर मंगळवारी रात्री झालेल्या बैठकीत त्यांनी प्रवक्त्यांचे कान टोचत यापुढे पक्षाची भूमिका मांडताना एकवाक्यता आणि सुसूत्रता राखण्याचे निर्देश दिले. पूर्णेकर हत्या प्रकरणाबरोबरच विधान परिषद निवडणुकीतील भाजपशी संबंधित वाद आणि अभिनेत्री दिया मिर्झाशी संबंधित प्रकरणातही प्रवक्त्यांकडून विसंगत भूमिका मांडली गेल्याचे बैठकीत नमूद करण्यात आल्याचे समजते.

उबाठा गटाचे विभागप्रमुख प्रदीप पूर्णेकर यांच्या हत्येनंतर ठाण्यातील राजकीय संघर्ष तीव्र झाला आहे. या प्रकरणात माजी महापौर मीनाक्षी शिंदे आणि राजेंद्र शिंदे यांना राजकीय पाठबळ असल्यामुळे त्यांच्यावर कारवाई होत नसल्याचा आरोप उबाठा गटाच्या नेत्यांकडून करण्यात आला होता. या आरोपांमुळे एकनाथ शिंदे यांच्या नेतृत्वाखालील शिवसेनेला राजकीय पातळीवर स्पष्टीकरण द्यावे लागत होते. या पार्श्वभूमीवर श्रीकांत शिंदे यांनी पक्षाच्या प्रवक्त्यांची बैठक घेऊन विविध मुद्द्यांवर पक्षाची भूमिका कशी मांडली जावी, याबाबत चर्चा केली.

https://www.prahaar.in/2026/11/04/government-of-maharashtra-special-drive-for-tribal-communities-to-facilitate-the-issuance-of-aadhaar-cards-and-birth-certificates/

पूर्णेकर प्रकरणात प्रवक्त्यांनी पक्षाची बाजू अपेक्षित पद्धतीने मांडली नसल्याची नाराजी श्रीकांत शिंदे यांनी बैठकीत व्यक्त केली. विधान परिषद निवडणुकीत भाजपशी झालेला वाद आणि दिया मिर्झा प्रकरणातही प्रवक्त्यांमध्ये एकवाक्यता नसल्याचे त्यांच्या निदर्शनास आणून देण्यात आले. यापुढे कोणत्याही विषयावर प्रतिक्रिया देण्यापूर्वी पक्षाकडून अधिकृत भूमिका निश्चित केली जाईल. त्यानंतर कोणत्या प्रवक्त्याने किती आणि कोणत्या मुद्द्यांवर बोलायचे, याची जबाबदारी ठरवली जाणार आहे.

बैठकीत काय ठरले?

प्रवक्त्यांच्या कामाचे विषय आणि भाषेनुसारही विभाजन करण्याचे बैठकीत ठरविण्यात आले. मराठी आणि महापालिकेशी संबंधित विषय कोण मांडणार, हिंदी व इंग्रजीत पक्षाची बाजू कोण मांडणार, राज्यस्तरीय विषयांची जबाबदारी कोणाकडे असेल, तसेच दिल्ली आणि राष्ट्रीय पातळीवरील मुद्द्यांवर कोण बोलणार, याची विभागणी केली जाणार आहे. हिंदी आणि इंग्रजीत पक्षाची भूमिका मांडण्याची जबाबदारी मिलिंद देवरा आणि शायना एनसी यांच्याकडे, तर स्थानिक विषयांवर नरेश म्हस्के आणि आनंद परांजपे यांच्याकडे सोपविण्यात येणार असल्याचे समजते.