Satara District Court Bomb Threat : सातारा जिल्हा व सत्र न्यायालयाला बॉम्बने उडवून देण्याची धमकी देणारा ई-मेल मिळाल्याने सोमवारी सकाळी परिसरात खळबळ उडाली. घटनेची माहिती मिळताच पोलिसांनी तातडीने घटनास्थळी धाव घेत न्यायालयाची इमारत आणि परिसर रिकामा केला. बॉम्ब शोधक व नाशक पथक (बीडीडीएस) तसेच श्वान पथकाकडून संपूर्ण परिसराची तपासणी सुरू करण्यात आली. (Satara District Court Bomb Threat)

https://www.prahaar.in/2026/11/02/trouble-mounts-for-nora-fatehi-court-alleges-actresss-conduct-is-inappropriate/

न्यायालयाच्या अधिकृत ई-मेलवर धमकीचा संदेश

मिळालेल्या माहितीनुसार, सोमवारी सकाळी सातारा जिल्हा न्यायालयाच्या अधिकृत ई-मेल आयडीवर धमकीचा संदेश प्राप्त झाला. न्यायालयात बॉम्ब ठेवल्याचा आणि इमारत उडवून देण्याचा उल्लेख या ई-मेलमध्ये करण्यात आल्याचे सांगण्यात येत आहे. यानंतर न्यायालय प्रशासनाने तातडीने सातारा शहर पोलिसांना याची माहिती दिली.

घटनेचे गांभीर्य लक्षात घेऊन वरिष्ठ पोलीस अधिकाऱ्यांसह मोठा पोलीस बंदोबस्त न्यायालय परिसरात दाखल झाला. खबरदारीचा उपाय म्हणून न्यायालयाची मुख्य इमारत आणि सर्व कक्ष रिकामे करण्याचे आदेश देण्यात आले. न्यायाधीश, वकील, न्यायालयीन कर्मचारी आणि कामानिमित्त आलेल्या पक्षकारांना सुरक्षितपणे बाहेर काढण्यात आले.

बीडीडीएस आणि श्वान पथकाकडून तपासणी

यानंतर बॉम्ब शोधक व नाशक पथक आणि श्वान पथकाने न्यायालयाच्या इमारतीची तपासणी सुरू केली. विविध न्यायालयीन कक्ष, न्यायमूर्तींची दालने, रेकॉर्ड रूम आणि परिसराची कसून पाहणी करण्यात येत आहे. मुख्य प्रवेशद्वारावरही कडक पोलीस बंदोबस्त तैनात करण्यात आला आहे.

सोमवार हा आठवड्याचा पहिला कामकाजाचा दिवस असल्याने न्यायालयात वकील, पक्षकार आणि कर्मचारी मोठ्या संख्येने उपस्थित होते. अचानक न्यायालय रिकामे करण्याचे आदेश मिळाल्याने परिसरात गर्दी झाली. धमकीच्या ई-मेलची माहिती पसरल्यानंतर घटनास्थळी बघ्यांचीही गर्दी जमली.

ई-मेल पाठवणाऱ्याचा शोध सुरू

 हा धमकीचा ई-मेल कोठून आणि कोणी पाठवला, याचा शोध पोलीस विभागाचे सायबर सेल घेत आहे. ई-मेलमागील नेमके कारण काय, याचाही तपास सुरू आहे. तपासातून अधिकृत माहिती समोर येईपर्यंत धमकीची सत्यता किंवा त्यामागील हेतूबाबत निष्कर्ष काढता येणार नाही. नागरिकांनी अफवांवर विश्वास ठेवू नये आणि शांतता राखावी, असे आवाहन पोलीस प्रशासनाकडून करण्यात आले आहे. दरम्यान, राज्यातील इतर कोर्टाना ही धमकीचा ईमेल प्राप्त झाल्याची माहिती समोर येत आहे.