Weather News: ऑक्टोबर महिना संपत आला असतानाच राज्यातील हवामानात पुन्हा बदल होताना दिसत आहे. काही भागांत ढगाळ वातावरण आणि उष्णतेचा त्रास जाणवत आहे, तर काही ठिकाणी हलक्या ते मध्यम पावसाच्या सरी कोसळत आहेत. राज्यभर पावसाचे एकसारखे चित्र नसून अनेक भागांत तापमानात वाढ होत आहे. दरम्यान, भारतीय हवामान विभागाने 30 ऑक्टोबर रोजी राज्यातील काही जिल्ह्यांसाठी पावसाचा यलो अलर्ट जारी केला आहे.

कोकणात काही ठिकाणी हलक्या सरी

पालघर, ठाणे आणि मुंबईत प्रामुख्याने कोरडे हवामान राहण्याचा अंदाज आहे. रायगड, रत्नागिरी आणि सिंधुदुर्ग जिल्ह्यांत काही ठिकाणी हलक्या पावसाच्या सरी पडू शकतात. त्यामुळे कोकणातील काही भागांत ढगाळ, तर काही ठिकाणी कोरडे वातावरण राहण्याची शक्यता आहे. 31 ऑक्टोबरनंतर राज्यात पुन्हा कोरड्या हवामानाचा प्रभाव वाढू शकतो.

https://www.prahaar.in/2026/10/29/central-railway-announces-major-night-mega-block-between-dombivli-and-ghatkopar-suburban-local-train-services-to-remain-suspended-with-diversions/

उत्तर महाराष्ट्र आणि मध्य महाराष्ट्रात पावसाची शक्यता

धुळे आणि नंदुरबारमध्ये कोरडे हवामान राहण्याचा अंदाज आहे. जळगावमध्ये काही ठिकाणी हलक्या सरी पडू शकतात. नाशिक जिल्हा आणि घाटमाथ्याच्या परिसरात पावसाची शक्यता असल्याने यलो अलर्ट देण्यात आला आहे. काही ठिकाणी मेघगर्जनेसह वादळी वारे वाहण्याची शक्यता असून, वाऱ्यांचा वेग ताशी 30 ते 40 किलोमीटरपर्यंत पोहोचू शकतो.

पुणे, कोल्हापूर, सातारा, सांगली आणि सोलापूर जिल्ह्यांतही काही ठिकाणी मेघगर्जनेसह हलका ते मध्यम पाऊस पडण्याची शक्यता आहे. घाटमाथ्याच्या भागात पावसाचा अंदाज वर्तवण्यात आला आहे.

मराठवाडा आणि विदर्भातही पावसाचा अंदाज

मराठवाड्यातील छत्रपती संभाजीनगर, जालना, परभणी आणि बीड जिल्ह्यांत काही ठिकाणी मेघगर्जनेसह हलका ते मध्यम पाऊस पडू शकतो. हिंगोली, नांदेड, लातूर आणि धाराशिव जिल्ह्यांत हलक्या सरींची शक्यता आहे. मात्र, या भागांतील सर्वच ठिकाणी पाऊस पडेल असे नाही.

विदर्भातील अमरावती, भंडारा, गडचिरोली, गोंदिया आणि नागपूर जिल्ह्यांसाठी यलो अलर्ट जारी करण्यात आला आहे. या भागांत ताशी 40 ते 50 किलोमीटर वेगाने वारे वाहू शकतात. तसेच विजांच्या कडकडाटासह वादळी पाऊस पडण्याची शक्यता आहे. काही ठिकाणी हलका ते मध्यम, तर तुरळक ठिकाणी जोरदार पाऊस पडू शकतो.

नागरिकांनी हवामानाच्या सूचनांचे पालन करावे

एकूणच, 30 ऑक्टोबर रोजी राज्यात संमिश्र हवामान राहण्याचा अंदाज आहे. काही जिल्ह्यांत पावसाच्या सरी, तर काही भागांत वादळी वाऱ्यांसह पावसाची शक्यता आहे. दुसरीकडे, अनेक ठिकाणी उष्ण आणि कोरडे हवामान कायम राहू शकते. त्यामुळे नागरिकांनी स्थानिक हवामानाचा अंदाज लक्षात घेऊन भारतीय हवामान विभागाच्या सूचनांचे पालन करावे.