मुंबई: मध्य रेल्वे प्रवाशांसाठी महत्त्वाची बातमी समोर आली आहे. डोंबिवली स्थानकावरील नवीन उत्तर पादचारी पुलाचे (FOB) गर्डर बसवण्यासाठी आणि घाटकोपर स्थानकावरील जुन्या उत्तर पादचारी पुलाचा सांगाडा (ट्रस) हटवण्यासाठी मध्य रेल्वेकडून विशेष वाहतूक आणि पॉवर ब्लॉक घेण्यात येणार आहे. दिनांक 30/31 ऑक्टोबर आणि 31 ऑक्टोबर/1 नोव्हेंबर 2026 दरम्यान रात्रीच्या वेळी हा ब्लॉक चालणार असून, रोड क्रेनच्या साहाय्याने ही महत्त्वाची तांत्रिक कामे पूर्ण केली जाणार आहेत.

ब्लॉकचा सविस्तर तपशील आणि वेळापत्रक

• ब्लॉक 1 (डोंबिवली स्थानक): हा ब्लॉक दिनांक 30/31.10.2026 रोजी (शुक्रवार/शनिवारची रात्र) दिवा आणि कल्याणदरम्यान ‘अप’ आणि ‘डाउन’ मार्गावर रात्री 01:20 ते 03:50 वाजेपर्यंत (2 तास 30 मिनिटे) असेल.
• ब्लॉक 2 (डोंबिवली व घाटकोपर): दिनांक 31 ऑक्टोबर/1 नोव्हेंबर 2026 च्या (शनिवार/रविवारची रात्र) रात्री डाऊन आणि अप ‘थ्रू’ लाईन्सवर कट्टा व पुलाच्या कामासाठी ब्लॉक असेल. यामध्ये घाटकोपर येथे उपनगरीय रेल्वे मार्गावर पहाटे 01:15 ते 03:45 वाजेपर्यंत (2 तास 30 मिनिटे) ब्लॉक घेतला जाईल.

https://www.prahaar.in/2026/10/29/central-railway-announces-mega-block-in-kasara-ghat-up-and-down-train-services-likely-to-be-disrupted/

लोकल आणि एक्सप्रेस गाड्यांवर काय परिणाम होणार?

या विशेष ब्लॉकमुळे प्रवाशांच्या सोयीसाठी आणि सुरक्षेसाठी काही गाड्यांच्या मार्गात बदल करण्यात आले आहेत:

• उपनगरीय सेवा: सीएसएमटीवरून सुटणाऱ्या कसारा (रात्री 00:08 वाजता) आणि कर्जत (रात्री 00:12 वाजता) लोकल ठाणे ते कल्याणदरम्यान डाउन जलद मार्गावरून वळवण्यात येतील. या गाड्या कोपर आणि ठाकुर्ली स्थानकांवर थांबणार नाहीत. तसेच कर्जत येथून मध्यरात्री 02:30 वाजता सुटणारी सीएसएमटी लोकल कल्याण-ठाणेदरम्यान अप जलद मार्गावरून धावेल.
• मेल आणि एक्सप्रेस गाड्या: लांब पल्ल्याच्या गाड्या, जसे की गाडी क्रमांक 22538 लोकमान्य टिळक टर्मिनस – गोरखपूर एक्सप्रेस आणि गाडी क्रमांक 18030 शालीमार – एलटीटी एक्सप्रेस, तसेच विशाखापट्टणम एक्सप्रेस 15 ते 20 मिनिटे उशिराने धावणार असून त्यांचे मार्ग अंशतः बदलण्यात आले आहेत.

रेल्वे प्रशासनाने प्रवाशांना आवाहन केले आहे की, त्यांनी या बदलांची नोंद घेऊनच आपल्या प्रवासाचे नियोजन करावे, जेणेकरून कोणत्याही गैरसोयीचा सामना करावा लागणार नाही.