आल्बनी: अमेरिका आणि इस्रायलच्या भीषण हल्ल्यानंतर इराणच्या अणुकार्यक्रमाबाबत एक अत्यंत मोठा आणि धक्कादायक खुलासा समोर आला आहे. संयुक्त राष्ट्रांच्या अणुऊर्जा संस्थेचे (IAEA) प्रमुख राफेल ग्रॉसी यांनी दिलेल्या ताज्या माहितीनुसार, जून 2025 पासून आतापर्यंत इराणने लष्करी हल्ल्यांमध्ये नुकसान झालेल्या अणुकेंद्रांची दुरुस्ती किंवा पुनर्बांधणी करण्याचा कोणताही प्रयत्न केल्याचे पुरावे मिळालेले नाहीत. या विधानामुळे आंतरराष्ट्रीय वर्तुळात पुन्हा एकदा खळबळ उडाली आहे.

संयुक्त राष्ट्रांच्या सुरक्षा परिषदेच्या (UNSC) बैठकीत बोलताना ग्रॉसी यांनी इराणला आपल्या सर्व अणुकेंद्रांच्या तपासणीची परवानगी देण्याचे तातडीचे आवाहन केले आहे. मिळालेल्या आकडेवारीनुसार, इराणकडे सध्या 440.9 किलोग्राम युरेनियमचा साठा असून, त्याचे 60% पर्यंत संवर्धन करण्यात आले आहे. मात्र, अण्वस्त्रांच्या निर्मितीसाठी साधारणपणे 90% पर्यंत युरेनियम संवर्धनाची आवश्यकता असते. गेल्या वर्षी जूनमध्ये झालेल्या हल्ल्यानंतर या साठ्याची सद्यस्थिती नेमकी काय आहे, याची कोणतीही खातरजमा आयएईएला करता आलेली नाही.

https://www.prahaar.in/2026/10/28/spain-train-crash-kills-at-least-10-as-2-high-speed-trains-collide-in-toledo-rail-services-between-madrid-and-andalusia-suspended-video/

दुसरीकडे, अमेरिकेचे राष्ट्राध्यक्ष डोनाल्ड ट्रम्प यांनी 28 फेब्रुवारी रोजी इराणच्या अणुकेंद्रांवर हल्ले झाल्याचा दावा करत, यामुळे इराणचा अणुकार्यक्रम पूर्णपणे उद्ध्वस्त झाल्याचे सांगितले होते. इराणला अण्वस्त्रे विकसित करण्यापासून रोखणे हा यामागचा मुख्य उद्देश होता, असे ट्रम्प यांनी स्पष्ट केले. मात्र, IAEA प्रमुखांच्या विधानामुळे हल्ल्यांनंतरच्या नुकसानीचे नेमके चित्र अद्याप अस्पष्टच आहे. ट्रम्प यांनी नुकताच इशारा दिला आहे की, तेहरानने करारासाठी तयारी न दर्शवल्यास वॉशिंग्टन आणखी एक मोठी लष्करी मोहीम सुरू करू शकते. अगदी याच आठवड्याच्या अखेरीस इराणवर पुन्हा जोरदार हल्ले होऊ शकतात, अशी शक्यता अमेरिकेच्या एका विशेष दूताने वर्तवली आहे.

सुरक्षा परिषदेच्या बैठकीत इराणचे उपराजदूत गुलामहुसैन दारजी यांनी अमेरिका आणि इस्रायलच्या हल्ल्यांवर मौन बाळगल्याबद्दल तीव्र नाराजी व्यक्त केली आणि याला आक्रमक युद्ध म्हटले. तर अमेरिकेचे राजदूत माइक वॉल्ट्झ यांनी, अणुसामग्रीच्या तपासणीसंदर्भातील जबाबदाऱ्या पार पाडण्यात इराण सातत्याने अपयशी ठरल्याचे सांगत इराणवर जोरदार हल्लाबोल केला.