मुंबई : नितेश तिवारी (Nitesh Tiwari) दिग्दर्शित बहुप्रतिक्षित ‘रामायण’ (Ramayan) या चित्रपटाची सध्या जगभरात जोरदार चर्चा सुरू आहे. अमेरिकेतील लॉस एंजिलीस येथील प्रसिद्ध ‘अकादमी म्युझियम ऑफ मोशन पिक्चर्स’ (Academy Museum of Motion Pictures) मध्ये या चित्रपटाचा अतिशय भव्य प्रीमियर सोहळा पार पडला. या रेड कार्पेट सोहळ्याला चित्रपटातील मुख्य कलाकार—अभिनेता रणबीर कपूर, (Ranbir Kapoor) अभिनेत्री सई पल्लवी, (Sai Pallavi) ‘केजीएफ’ फेम सुपरस्टार यश (Yash) आणि दिग्दर्शक नितेश तिवारी उपस्थित होते. या सोहळ्यात रेड कार्पेटवर पत्रकारांशी संवाद साधताना अभिनेत्री सई पल्लवीने या ऐतिहासिक चित्रपटातून प्रेक्षकांनी काय बोध घ्यावा, याबद्दल आपले विचार मांडले.

“भारतीय संस्कृती समजून घेण्यासाठी हा चित्रपट सर्वोत्तम”

भारतातील लोकांनी रामायणाची कथा लहानपणापासूनच ऐकली आहे, परंतु अमेरिकेतील आणि जगातील इतर देशांतील प्रेक्षकांनी या चित्रपटातून नक्की काय वेगळे पाहावे? असा प्रश्न साई पल्लवीला विचारण्यात आला होता. त्यावर उत्तर देताना ती म्हणाली, “जर कोणाला भारतीय संस्कृती, परंपरा आणि आपल्या महाकाव्यांबद्दल उत्सुकता असेल, तर रामायणाची सर्वात उत्कृष्ट आवृत्ती अनुभवण्यासाठी हा चित्रपट एक उत्तम सुरुवात ठरेल.” या चित्रपटासाठी जगभरातील सर्वोत्तम तंत्रज्ञ आणि अत्याधुनिक व्हिज्युअल इफेक्ट्स (VFX) वापरण्यात आले असल्याचेही तिने आवर्जून सांगितले.

https://www.prahaar.in/2026/10/28/spain-train-crash-kills-at-least-10-as-2-high-speed-trains-collide-in-toledo-rail-services-between-madrid-and-andalusia-suspended-video/

“रावण पूर्णपणे वाईट नव्हता; स्वतःतील उणिवा शोधण्याची गरज”

पुढे बोलताना सई पल्लवीने रावण या पात्राबद्दल आणि महाकाव्याच्या अध्यात्मिक संदेशावर भाष्य केले. ती म्हणाली, “जर तुमचा अशा ग्रंथांवर विश्वास असेल, तर हा चित्रपट पाहताना तुम्ही नक्कीच स्वतःच्या अंतर्मनात डोकावून पाहाल. आपल्यात काय चांगले आणि काय वाईट आहे, याचा विचार करून वेळोवेळी स्वतःमध्ये सुधारणा करायला शिकाल. कारण रावण हा काही पूर्णपणे वाईट व्यक्ती नव्हता. आपल्या प्रत्येकात वसलेला ‘रावण’ (वाईट विचार/उणिवा) ओळखणे आणि वेळेनुसार स्वतःमध्ये सकारात्मक बदल करणे हे अत्यंत महत्त्वाचे आहे.”

४,००० कोटींचे बजेट आणि तगडी स्टारकास्ट; दोन भागांत प्रदर्शित होणार चित्रपट

नितेश तिवारी दिग्दर्शित ‘रामायण’ हा चित्रपट प्राचीन भारतीय महाकाव्यावर आधारित दोन भागांची अत्यंत भव्य सिनेमॅटिक सिरीज आहे. या चित्रपटात रणबीर कपूर ‘प्रभू श्रीराम’, सई पल्लवी ‘माता सीता’ आणि दाक्षिणात्य सुपरस्टार यश ‘रावण’च्या मुख्य भूमिकेत दिसणार आहे. याशिवाय सनी देओल ‘हनुमान’ आणि रवी दुबे ‘लक्ष्मण’ यांची भूमिका साकारत आहेत. या चित्रपटाची निर्मिती नमित मल्होत्रा आणि यश करत असून, संगीताची धुरा ऑस्करविजेते ए. आर. रहमान आणि हॅन्स झिमर (Hans Zimmer) यांनी सांभाळली आहे. सुमारे ४,००० कोटी रुपयांच्या अभूतपूर्व बजेटमध्ये तयार होत असलेला हा चित्रपट दोन भागांत प्रदर्शित होणार आहे. यातील पहिला भाग ५ नोव्हेंबर २०२६ रोजी, तर दुसरा भाग २०२७ च्या दिवाळीत जगभरातील चित्रपटगृहांमध्ये प्रदर्शित होईल.