पुणे : पुण्यातील अत्यंत महत्त्वाच्या आणि बहुप्रतिक्षित हिंजवडी ते शिवाजीनगर (मेट्रो मार्गिका ३) या २३.३ किलोमीटरच्या मेट्रो लाईनच्या उद्घाटनाचा अखेर मुहूर्त ठरला आहे. आगामी ३ नोव्हेंबर रोजी देशाचे पंतप्रधान नरेंद्र मोदी (PM Narendra Modi) यांच्या हस्ते ऑनलाईन पद्धतीने या मेट्रो मार्गिकेचे दिमाखदार उद्घाटन होणार आहे. बालेवाडी येथील श्री शिवछत्रपती क्रीडा संकुलात या कार्यक्रमाचे आयोजन करण्यात आले असून, या प्रसंगी महाराष्ट्राचे मुख्यमंत्री देवेंद्र फडणवीस (Devendra Fadanvis) आणि दोन्ही उपमुख्यमंत्री एकनाथ शिंदे (eknath Shinde) आणि सुनेत्रा पवार (Sunetra Pawar) प्रत्यक्ष उपस्थित राहणार आहेत.

आयटी पार्क क्षेत्रातील वाहतूक कोंडीतून मोठा दिलासा

https://www.prahaar.in/2026/10/27/cyclone-arnab-live-tracker-red-alert-odisha-andhra-pradesh/

पुणे महानगर प्रदेश विकास प्राधिकरणाच्या (PMRDA) माध्यमातून ‘सार्वजनिक-खासगी भागीदारी’ (PPP) तत्त्वावर उभारण्यात आलेली ही मार्गिका पुण्याची ओळख असलेल्या हिंजवडी आयटी पार्कला थेट शहराच्या मध्यवर्ती भागाशी (शिवाजीनगर) जोडणार आहे. या मेट्रोमुळे हिंजवडी, बालेवाडी, बाणेर आणि शिवाजीनगर या भागांतील लाखो नोकरदार आणि प्रवाशांचा रोजचा वेळ वाचणार असून वाहतूक कोंडीची मोठी समस्या सुटण्यास मदत होणार आहे.

स्थानकांची सद्यस्थिती आणि नवीन प्रकल्पांचे भूमिपूजन

स्थानकांची स्थिती : २३.३ किलोमीटरच्या या संपूर्ण मार्गावर एकूण २३ स्थानके (स्टेशन्स) असून, त्यापैकी १७ स्थानके उद्घाटनासाठी पूर्णपणे तयार आहेत. उर्वरित ६ स्थानकांचे काम सध्या अंतिम टप्प्यात सुरू आहे.

नवीन प्रकल्पांची भेट : ३ नोव्हेंबर रोजी होणाऱ्या याच सोहळ्यात पुण्यातील मेट्रोच्या पुढील आणखी दोन टप्प्यांचे भूमिपूजन देखील पंतप्रधान मोदींच्या हस्ते केले जाणार आहे.

https://www.prahaar.in/2026/10/27/cyclone-arnab-live-tracker-red-alert-odisha-andhra-pradesh/

आचारसंहितेनंतर अधिकृत घोषणा

यापूर्वी विविध कारणांमुळे आणि विधान परिषद (पदवीधर व शिक्षक मतदारसंघ) निवडणुकीच्या आचारसंहितेमुळे या मेट्रोचे उद्घाटन लांबणीवर पडले होते. तसेच पंतप्रधान मोदींचा थेट पुणे दौरा पुढे ढकलला गेला असला, तरी प्रवाशांची सोय लक्षात घेता व्हर्च्युअल पद्धतीने ३ नोव्हेंबरलाच उद्घाटन करण्याचा निर्णय घेण्यात आला आहे. निवडणुकीची आचारसंहिता संपताच याबाबतची अधिकृत प्रशासकीय घोषणा केली जाईल. वारंवार पुढे ढकलल्या गेलेल्या या मेट्रो प्रकल्पाचे अखेर उद्घाटन होत असल्याने हिंजवडीत रोज प्रवास करणाऱ्या आयटी कर्मचाऱ्यांमध्ये आनंदाचे वातावरण आहे.