Weather News: महाराष्ट्रात ऑक्टोबर हिटचा चटका कायम असून, अनेक भागांत दिवसा तापमानाचा पारा 35 अंश सेल्सिअस किंवा त्यापुढे जात आहे. दुसरीकडे, गेल्या काही दिवसांत रात्रीच्या किमान तापमानात 2 ते 3 अंशांची घट नोंदवली जात आहे. अशातच राज्यातील काही भागांत 27 आणि 28 ऑक्टोबर रोजी हवामानात बदल होण्याची शक्यता वर्तवण्यात आली आहे. काही जिल्ह्यांत हलक्या ते मध्यम पावसासह विजांचा कडकडाट आणि जोरदार वारे वाहण्याची शक्यता आहे.

https://www.prahaar.in/2026/10/27/major-decision-by-microsoft-employees-in-4-countries-including-india-offered-the-option-to-leave-their-jobs-potentially-affecting-60000-employees/

कोकणात उष्णतेचा चटका कायम

मुंबई, ठाणे, पालघर, रायगड, रत्नागिरी आणि सिंधुदुर्ग या जिल्ह्यांत 27 ऑक्टोबर रोजी हवामान प्रामुख्याने कोरडे राहण्याचा अंदाज आहे. या भागांत उष्णतेचा त्रास जाणवू शकतो. उपलब्ध माहितीनुसार, सध्या कोणताही हवामान अलर्ट जारी करण्यात आलेला नाही. मात्र, पुढील दिवशी काही ठिकाणी हलक्या पावसाच्या सरी पडण्याची शक्यता आहे.

उत्तर महाराष्ट्रात हवामान कोरडे

धुळे, नंदुरबार, जळगाव आणि नाशिक जिल्ह्यांत हवामान कोरडे राहण्याची शक्यता आहे. या भागांत सध्या कोणताही अलर्ट नसल्याचे सांगण्यात आले आहे. मात्र, 28 ऑक्टोबर रोजी जळगाव आणि नाशिकच्या घाटमाथ्यावरील काही भागांत हलक्या पावसाचा अंदाज आहे.

पश्चिम महाराष्ट्रात पावसाची शक्यता

पुणे, अहिल्यानगर, कोल्हापूर, सातारा, सांगली आणि सोलापूर जिल्ह्यांत उष्ण व कोरडे हवामान कायम राहण्याची शक्यता आहे. मात्र, 28 ऑक्टोबर रोजी पश्चिम महाराष्ट्रातील काही भागांत हलक्या ते मध्यम पावसासह काही ठिकाणी जोरदार सरी कोसळू शकतात. कोल्हापूर जिल्ह्यासाठी यलो अलर्टची शक्यता वर्तवण्यात आली आहे.

मराठवाड्यात 28 ऑक्टोबरला पावसाचे संकेत

छत्रपती संभाजीनगर, जालना, परभणी, बीड, हिंगोली, नांदेड, लातूर आणि धाराशिव जिल्ह्यांत हवामान उष्ण व कोरडे राहण्याचा अंदाज आहे. मात्र, 28 ऑक्टोबर रोजी मराठवाड्यातील काही भागांत हलक्या ते मध्यम पावसासह जोरदार सरी पडण्याची शक्यता आहे.

विदर्भातील 3 जिल्ह्यांना यलो अलर्टचा अंदाज

विदर्भात सध्या संमिश्र हवामान अनुभवायला मिळत आहे. अकोला, अमरावती, भंडारा, बुलढाणा, गोंदिया, नागपूर, वर्धा आणि वाशिम या जिल्ह्यांत कोणताही अलर्ट नसल्याचे सांगण्यात आले आहे. दुसरीकडे, चंद्रपूर, गडचिरोली आणि यवतमाळ जिल्ह्यांत यलो अलर्टची शक्यता वर्तवण्यात आली आहे.

या जिल्ह्यांत ताशी 40 ते 50 किलोमीटर वेगाने वारे वाहण्याची शक्यता असून, विजांच्या कडकडाटासह हलका ते मध्यम पाऊस पडू शकतो. काही ठिकाणी जोरदार सरींचाही अंदाज आहे.

नागरिकांनी काळजी घेण्याचे आवाहन

एकूणच, 27 ऑक्टोबर रोजी राज्यातील बहुतांश भागांत उष्ण आणि कोरडे हवामान राहण्याची शक्यता आहे. मात्र, 28 ऑक्टोबरपासून काही भागांत पावसासाठी पोषक वातावरण निर्माण होऊ शकते. नागरिकांनी दुपारच्या कडक उन्हात बाहेर पडताना काळजी घ्यावी, पुरेसे पाणी प्यावे आणि वादळी पावसाचा अंदाज असलेल्या भागांत हवामान विभागाच्या सूचनांचे पालन करावे.