मुंबई : मुंबईतील घाटकोपर रेल्वे स्थानक परिसरात माणुसकीला काळिमा फासणारी घटना समोर आली आहे. पत्नीशी झालेल्या वादानंतर एका पित्याने आपल्या अवघ्या नऊ महिन्यांच्या बाळाला स्कायवॉकवरून खाली फेकल्याचा आरोप आहे. रविवारी रात्री सुमारे दहाच्या सुमारास ही घटना घडली. या घटनेत बाळ गंभीर जखमी झाले असून, त्याच्यावर शीव येथील रुग्णालयात अतिदक्षता विभागात उपचार सुरू असल्याची माहिती आहे. या प्रकरणी घाटकोपर पोलिसांनी आईच्या तक्रारीवरून आरोपी पतीविरोधात गुन्हा दाखल करून त्याला अटक केली आहे.

नेमकी घटना काय?

या प्रकरणातील तक्रारदार महिलेचे नाव आरती जाफर शेख (वय 22) असे आहे. ती घाटकोपरमधील सर्वोदय नगर परिसरात राहते. सुमारे दोन वर्षांपूर्वी तिचा जाफर शेख (वय 23) याच्याशी विवाह झाला होता. या दाम्पत्याला आरव नावाचा नऊ महिन्यांचा मुलगा आहे. आरोपी परिसरात कपडे विक्रीचा व्यवसाय करत असल्याची माहिती आहे. मिळालेल्या माहितीनुसार, आरोपीच्या कथित व्यसनाच्या सवयीवरून पती-पत्नीमध्ये गेल्या काही महिन्यांपासून वारंवार वाद होत होते. रविवारीही दोघांमध्ये जोरदार वाद झाल्याचे सांगितले जाते. त्यानंतर ही धक्कादायक घटना घडल्याचा आरोप आहे.

पत्नीशी वाद सुरू असतानाच बाळाला खाली फेकल्याचा आरोप

रविवारी रात्री सुमारे दहाच्या सुमारास आरती आपल्या नऊ महिन्यांच्या बाळासह घाटकोपर पूर्व रेल्वे स्थानक परिसरातील स्कायवॉकवर होती. त्याचवेळी तिचा पती जाफर तेथे आला आणि दोघांमध्ये पुन्हा वाद सुरू झाला. या वादादरम्यान जाफर बाळाला घेऊन जाण्याचा प्रयत्न करू लागला. आरतीने त्याला रोखण्याचा प्रयत्न केला. मात्र, त्यानंतर त्याने कथितपणे बाळाला स्कायवॉकवरून खाली फेकले. या प्रकारामुळे परिसरात एकच खळबळ उडाली. बाळाला गंभीर दुखापत झाल्याने तातडीने उपचारांची गरज निर्माण झाली.

https://www.prahaar.in/2026/10/26/11th-accused-arrested-in-tiger-shroff-attack-case-remanded-in-police-custody-till-october-31/

बाळावर अतिदक्षता विभागात उपचार

घटना लक्षात येताच आरतीने खाली धाव घेतली. स्थानिक नागरिकांच्या मदतीने जखमी बाळाला प्रथम राजावाडी रुग्णालयात दाखल करण्यात आले. बाळाची प्रकृती गंभीर असल्याने त्याला पुढील उपचारांसाठी शीव रुग्णालयात हलवण्यात आले. सध्या त्याच्यावर अतिदक्षता विभागात उपचार सुरू असल्याची माहिती आहे. दरम्यान, आरतीच्या तक्रारीनंतर घाटकोपर पोलिसांनी आरोपी जाफर शेख याच्याविरोधात गुन्हा दाखल करून त्याला अटक केली आहे. या प्रकरणाचा पुढील तपास पोलीस करत आहेत. बाळाची प्रकृती आणि घटनेबाबतची अधिकृत माहिती तपासातून स्पष्ट होणार आहे.