Nashik Kumbh Mela : सिंहस्थ कुंभमेळ्याच्या ध्वजारोहण सोहळ्याच्या पार्श्वभूमीवर नाशिकमध्ये उद्या, रविवार (दि. २५ ऑक्टोबर) कोजागरी पौर्णिमेच्या शुभमुहूर्तावर ५०१ जणांचा सामूहिक शंखनाद आयोजित करण्यात आला आहे. देवमामलेदार पटांगणाजवळ होणाऱ्या या उपक्रमातून गिनीज वर्ल्ड रेकॉर्डमध्ये नोंद करण्याचा प्रयत्न केला जाणार आहे. या उपक्रमामुळे गोदातीरावर धार्मिक आणि सांस्कृतिक वातावरण निर्माण होणार आहे.

५०१ शंखांचा निनाद; विश्वविक्रमाचे लक्ष्य

एकाच वेळी सर्वाधिक जणांनी शंखनाद करण्याचा विश्वविक्रम प्रस्थापित करण्याच्या उद्देशाने या कार्यक्रमाचे आयोजन करण्यात आले आहे. सध्या ३०३ जणांनी एकाच वेळी शंखनाद केल्याची नोंद असलेला विक्रम मागे टाकण्याचे आयोजकांचे लक्ष्य आहे. गिनीज वर्ल्ड रेकॉर्डच्या पथकाकडून सहभागींची उपस्थिती आणि आवश्यक निकषांची पडताळणी केल्यानंतर हा प्रयत्न केला जाणार आहे. नाशिक त्र्यंबकेश्वर कुंभमेळा प्राधिकरण आणि गुणगौरव न्यास संचालित अनंतविजय शंखनाद पथक यांच्या पुढाकारातून हा उपक्रम राबविण्यात येत आहे.

३१ ऑक्टोबरला ध्वजारोहणावेळीही शंखनाद

सिंहस्थ कुंभमेळ्याच्या ध्वजारोहण सोहळ्याशी या उपक्रमाची सांगड घालण्यात आली आहे. ३१ ऑक्टोबर रोजी होणाऱ्या ध्वजारोहणाच्या नेमक्या क्षणी याच समूहातील २५१ शंखवादक सामूहिक शंखनाद करणार आहेत. त्यामुळे कुंभमेळ्याच्या मंगलारंभावेळी पारंपरिक शंखनादातून धार्मिक आणि सांस्कृतिक वारशाचे दर्शन घडणार आहे.

https://www.prahaar.in/2026/10/24/nashik-ozar-airport-important-news-for-the-people-of-nashik-new-flight-schedule-for-ozar-airport-starting-october-25th/

शंखनाद ही भारतीय परंपरेची ओळख

भारतीय धार्मिक परंपरेत शुभकार्याच्या प्रारंभी शंखनाद करण्याला विशेष महत्त्व आहे. धार्मिक विधी, उत्सव आणि मंगलकार्यांमध्ये शंखनादाला पवित्रतेचे प्रतीक मानले जाते. सिंहस्थ कुंभमेळ्याच्या पार्श्वभूमीवर आयोजित करण्यात आलेल्या या उपक्रमातून प्राचीन परंपरेचा जागर करण्यासोबतच नाशिकच्या सांस्कृतिक वारशाला व्यापक व्यासपीठ मिळवून देण्याचा प्रयत्न आहे. कुंभमेळा आयुक्त शेखर सिंह यांनीही या उपक्रमाचे महत्त्व अधोरेखित केले. ५०१ जणांनी एकत्रित शंखनाद करणे हा नाशिकसाठी विशेष क्षण ठरेल. विश्वविक्रमाचा प्रयत्न करतानाच भारतीय सांस्कृतिक आणि आध्यात्मिक परंपरेचा व्यापक स्तरावर प्रसार व्हावा, अशी अपेक्षा त्यांनी व्यक्त केली. ध्वजारोहणाच्या वेळीही शंखनाद होणार असल्याने या परंपरेला सिंहस्थाच्या मंगलारंभाशी जोडण्याची संधी मिळणार असल्याचे त्यांनी सांगितले.

सायंकाळी शंखनाद; त्यानंतर गोदा आरती

उद्या सायंकाळी चार वाजल्यापासून कार्यक्रमस्थळी सहभागी शंखवादकांची नोंदणी, उपस्थिती तपासणी आणि पडताळणी सुरू होणार आहे. त्यानंतर गिनीज वर्ल्ड रेकॉर्डच्या निकषांनुसार विश्वविक्रमाचा प्रयत्न केला जाईल. सायंकाळी सुमारे ५.५० वाजता सामूहिक शंखनादाचे नियोजन आहे. यानंतर सायंकाळी सात वाजता गोदा आरती होणार आहे. सामूहिक शंखनाद आणि गोदा आरतीमुळे गोदातीरावर भक्तिमय वातावरण अनुभवायला मिळणार आहे.

कार्यक्रमाची माहिती

– दिनांक : रविवार, २५ ऑक्टोबर २०२६

– स्थळ : देवमामलेदार पटांगणाजवळ, नाशिक

– सहभाग : ५०१ शंखवादक

– शंखनादाची नियोजित वेळ : सायंकाळी ५.५० वाजता

– गोदा आरती : सायंकाळी ७ वाजता

सिंहस्थ कुंभमेळ्याच्या ध्वजारोहणापूर्वी होणारा हा सामूहिक शंखनाद नाशिकच्या धार्मिक आणि सांस्कृतिक परंपरेला उजाळा देणारा उपक्रम ठरणार आहे.