मुंबई: पश्चिम रेल्वे प्रशासनाकडून प्रवाशांसाठी एक महत्त्वाची बातमी समोर आली आहे. आगामी रविवार, 25 ऑक्टोबर 2026 रोजी पश्चिम रेल्वेच्या उपनगरीय विभागात दिवसकालीन (दिवसाचा) कोणताही ब्लॉक घेण्यात येणार नाही. त्यामुळे प्रवाशांना रविवारी सुरळीत प्रवासाचा लाभ घेता येणार असून कोणताही मेगा ब्लॉक प्रवाशांच्या मार्गात अडथळा ठरणार नाही. तथापि, रेल्वेचे रूळ, सिग्नल यंत्रणा तसेच ओव्हरहेड उपकरणांच्या (OHE) तातडीच्या देखभालीचे व दुरुस्तीचे काम सुरळीत पार पाडण्यासाठी पश्चिम रेल्वेने शनिवार आणि रविवारच्या मध्यरात्री विशेष खबरदारी घेतली आहे. 24 आणि 25 ऑक्टोबर 2026 च्या मध्यरात्री सांताक्रुज़ आणि गोरेगांव स्थानकांदरम्यान अप व डाऊन फास्ट लाईनवर पाच तासांचा रात्रकालीन जम्बो ब्लॉक हाती घेण्यात येणार आहे. हा ब्लॉक रात्री 12.30 वाजल्यापासून पहाटे 04.30 वाजेपर्यंत चालणार आहे.

https://www.prahaar.in/2026/10/23/mumbai-local-train-services-between-vashind-and-athgaon-disrupted-due-to-a-special-block-in-the-kalyan-kasara-section/

पश्चिम रेल्वेचे मुख्य जनसंपर्क अधिकारी विनीत अभिषेक यांनी प्रसिद्ध केलेल्या पत्रकानुसार, या रात्रकालीन ब्लॉकच्या कालावधीत सांताक्रुज़ व गोरेगांव स्थानकांदरम्यान धावणाऱ्या सर्व जलद (फास्ट) मार्गावरील गाड्या धीम्या (स्लो) मार्गावर वळवून चालवण्यात येणार आहेत. याशिवाय, या विशेष देखभालीच्या कामादरम्यान काही उपनगरीय लोकल फेऱ्या रद्द सुद्धा करण्यात येणार आहेत. प्रवाशांची गैरसोय टाळावी यासाठी प्रभावित झालेल्या लोकल गाड्यांची सविस्तर यादी संबंधित उपनगरीय विभागातील सर्व स्थानकांच्या स्टेशन मास्टरांकडे उपलब्ध करून देण्यात आली आहे. त्यामुळे रात्रीच्या वेळी किंवा रविवारी प्रवासाचे नियोजन करणाऱ्या प्रवाशांनी या बदलांची योग्य नोंद घ्यावी आणि रेल्वे प्रशासनाने दिलेल्या सूचनेनुसारच आपल्या प्रवासाची आखणी करावी, असे आवाहन पश्चिम रेल्वेकडून करण्यात आले आहे.