नवी दिल्ली : भारत आणि चीनच्या सीमेवर अद्यापही तणावाचे वातावरण कायम असल्याची महत्त्वपूर्ण माहिती समोर आली आहे. इंडो-तिबेटन बॉर्डर पोलिसांचे (ITBP) महासंचालक शत्रुजीत कपूर यांनी एका कार्यक्रमात बोलताना अरुणाचल प्रदेशमधील विविध भागांत भारत आणि चीनच्या सैनिकांमध्ये ‘फेस-ऑफ’ (आमनेसामने येणे) सुरूच असची अधिकृत पुष्टी दिली आहे. विशेष म्हणजे, सुरक्षा दलाच्या एखाद्या वरिष्ठ प्रमुखाने सीमावर्ती तणावाबाबत उघडपणे आणि थेट वक्तव्य करण्याची ही पहिलीच वेळ आहे.

अलवरमधील कार्यक्रमात झाला खुलासा

राजस्थानमधील अलवर येथे पार पडलेल्या आयटीबीपीच्या वार्षिक ‘हिमवीर सम्मान समारोह’ सोहळ्यात महासंचालक शत्रुजीत कपूर यांनी हा गौप्यस्फोट केला. गेल्या काही दिवसांत अरुणाचल प्रदेशमधील अनेक ठिकाणी दोन्ही देशांचे सैन्य समोरासमोर आले असून, हा सीमावाद अजूनही पूर्णपणे सुटलेला नाही, असे त्यांनी स्पष्ट केले. या विधानामुळे सीमेवरील प्रत्यक्ष परिस्थितीची गंभीरता पुन्हा एकदा अधोरेखित झाली आहे.

आसाफिला परिसरातील वाद आणि चायनीज तंबू

मिळालेल्या सविस्तर माहितीनुसार, अरुणाचल प्रदेशच्या अप्परसुबनसिरी जिल्ह्यातील टाक्सिंग भागात गेल्या काही महिन्यांपासून हा तिढा सुरू आहे. चिनी पीएलए (PLA) सैनिकांनी प्रत्यक्ष नियंत्रण रेषेच्या (LAC) जवळ असलेल्या आसाफिला परिसराजवळ आपले तंबू ठोकल्याची माहिती समोर आली आहे. भारतीय हद्दीतील ‘मजा’ कंपनी ऑपरेटिंग बेसपासून अंदाजे ६ ते ७ किलोमीटर आत हा वाद निर्माण झाला आहे. नियमित गस्तीदरम्यान हा प्रकार उघडकीस आल्यानंतर भारतीय लष्करानेही संबंधित भागात तातडीने मोठी कुमक तैनात केली आहे.

https://www.prahaar.in/2026/10/23/out-of-297-days-in-mumbai-231-had-satisfactory-air-quality-this-year-too-mumbai-is-expected-to-have-more-than-232-pollution-free-days/

शौर्य कमांडोजच्या धाडसाचे कौतुक

या अत्यंत कठीण आणि आव्हानात्मक सीमावर्ती भागात अत्यंत धैर्याने परिस्थिती हाताळणाऱ्या आयटीबीपीच्या नवीन ‘शौर्य कमांडो’ प्लॅटोन्सच्या कामगिरीची मुत्सद्दीपणे प्रशंसा करण्यात आली. अतिदुर्गम आणि उच्च पर्वतीय प्रदेशात जवानांच्या सुरक्षेला प्राधान्य दिले जात असून, त्यांना अत्याधुनिक प्रशिक्षण, नवीन ड्रोन युनिट्स आणि पायाभूत सुविधा पुरवल्या जात आहेत. तसेच, कठीण भूप्रदेशाचा सामना करण्यासाठी भूमिगत निवारा केंद्रे (Underground Shelters) उभारण्यावरही विशेष भर दिला जात असल्याचे सांगण्यात आले.

चर्चा सुरू असतानाही संघर्ष कायम

विशेष बाब म्हणजे, एका बाजूला दोन्ही देशांमध्ये उच्चस्तरीय राजकीय आणि लष्करी पातळीवर वाटाघाटी सुरू असताना, दुसरीकडे हा सीमातणाव कायम असल्याचे दिसून येत आहे. सप्टेंबर महिन्यात चीनचे राष्ट्राध्यक्ष शी जिनपिंग नवी दिल्लीत झालेल्या ब्रिक्स (BRICS) परिषदेसाठी भारतात आले होते. तसेच, दोन्ही देशांच्या लष्करी अधिकाऱ्यांमध्ये वचा-दमाई येथे कोअर कमांडर पातळीवरील चर्चाही पार पडली होती. असे असले तरी, प्रत्यक्ष सीमेवरील वास्तव अद्याप पूर्णपणे पूर्वपदावर आलेले नाही. सुदैवाने, या ताज्या संघर्षाच्या घटनांमध्ये कोणत्याही प्रकारची हिंसा किंवा जीवितहानी झाल्याचे वृत्त नाही. स्थानिक पातळीवर संघर्ष अधिक वाढू नये म्हणून दोन्ही देश लष्करी आणि राजनैतिक मार्गांचा प्रभावी वापर करत परिस्थिती नियंत्रणात ठेवण्याचा प्रयत्न करत आहेत.