मुंबई: एसटी बसस्थानकांवरील प्रसाधनगृहांची स्वच्छता राखण्यात हलगर्जीपणा झाल्यास संबंधित विभाग नियंत्रकांना थेट जबाबदार धरले जाईल, असा स्पष्ट इशारा परिवहन मंत्री तथा महाराष्ट्र राज्य मार्ग परिवहन महामंडळाचे अध्यक्ष प्रताप सरनाईक यांनी दिला आहे. प्रवाशांना स्वच्छ, निरोगी आणि आरोग्यदायी प्रसाधनगृहे उपलब्ध करून देणे ही एसटी महामंडळाची मूलभूत जबाबदारी असून, त्यात कोणतीही तडजोड स्वीकारली जाणार नसल्याचे त्यांनी ठणकावून सांगितले.

अधिकाऱ्यांची हयगय खपवून घेणार नाही

एसटी महामंडळाच्या मुख्यालयात आयोजित स्वच्छता आढावा बैठकीत मंत्री सरनाईक बोलत होते. यावेळी महामंडळाचे सर्व विभागप्रमुख, प्रादेशिक व्यवस्थापक आणि विभाग नियंत्रक उपस्थित होते. सर्वसामान्य प्रवाशांकडून स्वच्छता अधिभार आकारला जात असताना, त्याबदल्यात त्यांना किमान स्वच्छतेच्या सुविधा मिळणे अपेक्षित आहे. बसस्थानकांवरील प्रसाधनगृहे अस्वच्छ असतील, तर त्याचा थेट परिणाम एसटीच्या प्रतिमेवर होतो. त्यामुळे स्वच्छतेच्या बाबतीत कोणतीही कुचराई चालणार नाही, असे त्यांनी स्पष्ट केले.

https://www.prahaar.in/2026/10/22/sunetra-pawar-maharashtra-cabinet-reshuffle-ministers-dropped/

कंत्राटदारांवरच मदार नाही, अधिकाऱ्यांनी स्वतः लक्ष ठेवावे

बसस्थानकांवरील प्रसाधनगृहांची नियमित तपासणी करावी आणि संबंधित कंत्राटदार संस्थांकडून करारानुसार योग्य प्रकारे स्वच्छता करून घ्यावी, असे निर्देश त्यांनी दिले. केवळ कंत्राटदारांवर जबाबदारी ढकलून चालणार नाही, तर संबंधित अधिकाऱ्यांनी आपल्या कार्यक्षेत्रातील स्वच्छतेवर स्वतः लक्ष ठेवणे आवश्यक आहे, असे त्यांनी अधोरेखित केले. प्रवाशांना सुरक्षित आणि सुखकर प्रवासासोबतच स्वच्छ परिसर देणे प्रशासनाची जबाबदारी असल्याचे त्यांनी नमूद केले.