मुंबई : भाजप प्रदेशाध्यक्ष रवींद्र चव्हाण यांच्या उपस्थितीत झालेल्या पदवीधर आणि शिक्षक मतदारसंघातील पक्षाच्या उमेदवारांच्या प्रचार शुभारंभाच्या कार्यक्रमाला अनुपस्थित राहणे पुण्यातील भाजपच्या 100 नगरसेवकांना भोवले आहे. पक्षाने या नगरसेवकांना कारणे दाखवा नोटीस बजावून पाच दिवसांत खुलासा करण्याचे निर्देश दिले आहेत. पक्षाच्या महत्त्वाच्या कार्यक्रमाला अनुपस्थित राहून शिस्तभंग केल्याचा ठपका ठेवण्यात आल्याने भाजपच्या वर्तुळात या कारवाईची चर्चा सुरू झाली आहे.

पुणे विभागातील पदवीधर आणि शिक्षक मतदारसंघांच्या निवडणुकांच्या पार्श्वभूमीवर मागील आठवड्यात प्रदेशाध्यक्ष रवींद्र चव्हाण यांच्या हस्ते प्रचाराचा शुभारंभ करण्यात आला. या कार्यक्रमाला केंद्रीय राज्यमंत्री मुरलीधर मोहोळ, उच्च व तंत्रशिक्षण मंत्री चंद्रकांत पाटील, राज्यमंत्री माधुरी मिसाळ, महापौर मंजुषा नागपुरे यांच्यासह भाजपचे आमदार उपस्थित होते. पक्षाच्या सर्व नगरसेवकांनाही कार्यक्रमाला उपस्थित राहण्याचे निरोप देण्यात आले होते. मात्र, शंभरहून अधिक नगरसेवकांनी कार्यक्रमाकडे पाठ फिरवली. काही नगरसेवक कार्यक्रमाला उपस्थित राहून लगेच निघून गेल्याचेही समोर आले.

नगरसेवकांच्या अनुपस्थितीची बाब लक्षात आल्यानंतर सभागृहनेते गणेश बिडकर यांनी उपस्थित नगरसेवकांची नोंद घेण्याच्या सूचना दिल्या. त्यांनी स्वतः सभागृहात फिरून कोणते नगरसेवक उपस्थित आहेत, याची खातरजमा केली. त्यानंतर अनुपस्थित नगरसेवकांना कारणे दाखवा नोटीस बजावण्याचा निर्णय घेण्यात आला.

https://www.prahaar.in/2026/10/14/financial-aid-of-%e2%82%b95000-for-drought-affected-farmers-before-diwali/

पुणे महापालिकेत भाजपचे 119 नगरसेवक निवडून आले असून, सात स्वीकृत नगरसेवकांसह पक्षाचे सभागृहातील संख्याबळ 126 आहे. त्यापैकी 100 नगरसेवकांना नोटीस बजावण्यात आली आहे. या नगरसेवकांचे खुलासे प्राप्त झाल्यानंतर त्यांचा अहवाल वरिष्ठ पातळीवर सादर केला जाणार आहे. त्यानंतर संबंधित नगरसेवकांवर कोणती कारवाई करायची, याचा निर्णय घेतला जाणार आहे.