अबुधाबी : दुबईहून तेल अवीवच्या दिशेने जाणाऱ्या ‘फ्लाय दुबई’ (Flydubai) विमानावर झालेल्या हल्ल्याप्रकरणी एक मोठी आणि खळबजनक बातमी समोर आली आहे. वृत्तसंस्थांच्या माहितीनुसार, संयुक्त अरब अमिरातीच्या (UAE) पोलिसांनी या कटाशी संबंधित असल्याच्या संशयावरून फ्लाय दुबईसाठी काम करणाऱ्या मालदीवच्या दोन वैमानिकांना (Pilots) अटक केली आहे.

काय आहे नेमके प्रकरण?

गत 30 सप्टेंबर रोजी दुबईहून तेल अवीव जाणारे विमान हायजॅक करून ते कोसळवण्याचा एक कथित प्रयत्न करण्यात आला होता. ओमानचा नागरिक आणि या विमानाचा सहवैमानिक हम्माम अल-हम्मामी याने विमानाचा ताबा मिळवण्याच्या उद्देशाने मुख्य वैमानिक (कॅप्टन) यांच्यावर कुऱ्हाडीने जीवघेणा हल्ला केला होता. मात्र, मुख्य वैमानिकाने प्रसंगावधान राखत हा मोठा घातपात हाणून पाडला होता.

मालदीवच्या वैमानिकांवर संशय का?

तपासाची व्याप्ती वाढवल्यानंतर यूएई पोलिसांनी 3 ऑक्टोबर रोजी मालदीवच्या या दोन्ही वैमानिकांना ताब्यात घेतले. प्राथमिक तपासात असे समोर आले आहे की, अटक करण्यात आलेले दोन्ही वैमानिक मुख्य आरोपी सहवैमानिक अल-हम्मामी याच्या संपर्कात होते. एवढेच नव्हे तर, ते सर्वजण एकाच इमारतीत राहत असल्याचा संशय आहे. या दोन्ही वैमानिकांचे अल-हम्मामीसोबत वैयक्तिक आणि व्यावसायिक पातळीवर जवळचे संबंध असल्याचे सांगितले जात असून, त्यांच्याकडे फ्लाईट ड्युटीच्या शिफ्ट्सही सोबत असल्याचा दावा केला जात आहे.

https://www.prahaar.in/2026/10/13/france-supermarket-fridge-cyber-attack-food-spoiled-losses/

दूतावासाकडून दुजोरा, अधिकृत माहिती प्रतीक्षेत

यूएईमधील मालदीवच्या दूतावासाने या वैमानिकांच्या अटकेची माहिती त्यांच्या कुटुंबीयांना अधिकृतपणे दिली आहे. मात्र, या प्रकरणातील त्यांचा नेमका सहभाग किंवा त्यांच्याविरोधातील पुराव्यांबाबत यूएई किंवा मालदीवच्या प्रशासनाकडून अद्याप कोणतीही सविस्तर अधिकृत माहिती जाहीर करण्यात आलेली नाही. या गंभीर घटनेमुळे आंतरराष्ट्रीय विमान वाहतूक क्षेत्रात खळबळ उडाली असून तपास यंत्रणा यामागील मोठ्या कटाचा कसून शोध घेत आहेत.