आयसीसीकडून दर बुधवारी आठवड्याच्या कामगिरीचा आढावा घेऊन क्रमवारी जाहीर करण्यात येते. नुकतीच आयसीसीने वनडे क्रमवारी जाहीर केली असून त्यात बरीच उलथापालथ झाल्याचं पाहायला मिळत आहे. भारत वेस्ट इंडिज वनडे मालिकेचा या क्रमवारीवर स्पष्ट परिणाम दिसून येत आहे. वेस्ट इंडिजविरुद्धच्या तिसऱ्या वनडे सामन्यात विराट कोहली शून्यावर बाद झाला होता. त्याचा परिणाम त्यांच्या गुणांकनावर झाला आहे. विराट कोहलीची वनडे क्रमावारीत घसरण झाली आहे. मागच्या आठवड्यात विराट कोहली वनडे क्रमवारीत दुसऱ्या क्रमांकावर होता. पण आता त्याची घसरण झाली असून तिसऱ्या स्थानावर आहे. दुसरीकडे, टी20 क्रमवारीत श्रेयस अय्यरने मोठी झेप घेतली आहे. एशियन गेम्स स्पर्धेतील कामगिरीनंतर त्याला फायदा झाला आहे. त्याने एका झटक्यात 18 खेळाडूंना मागे टाकलं आहे.

शुभमन गिलची सरशी

वनडे क्रमवारीत भारतीय कर्णधार शुभमन गिलचा डंका वाजला आहे. मागच्या आठवड्यात शतकी खेळीनंतर द्विशतकी खेळीही त्याच्या पथ्यावर पडली आहे. त्यामुळे शुभमन गिल 841 रेटिंग पॉइंटसह पहिल्या स्थानावर आहे. तर मागच्या आठवड्यात तिसऱ्या क्रमांकावर असलेल्या न्यूझीलंडच्या डॅरिल मिचेलने एक स्थानाची झेप घेत दुसरं स्थान गाठलं आहे. डॅरिल मिचेलचं रेटिंग पॉइंट हे 794 इतकं आहे. तर विराट कोहलीची दुसऱ्या स्थानावरून तिसऱ्या स्थानावर घसरण झाली आहे. विराट कोहली 781 रेटिंग पॉइंटसह तिसऱ्या स्थानावर आहे. तर रोहित शर्माची वनडे रँकिंग कायम आहे. रोहित शर्मा 770 रेटिंग पॉइंटसह चौथ्या स्थानावर आहे.

आयसीसीच्या ताज्या क्रमवारीनुसार, भारताचे चार फलंदाज टॉप 10 मध्ये आहेत. त्यापैकी तीन फलंदाज हे टॉप 5 मध्ये आहेत. तर केएल राहुलची टॉप 10 मध्ये एन्ट्री झाली आहे. केएल राहुल शतकी खेळीनंतर 11व्या स्थानावरून 10व्या स्थानी विराजमान झाला आहे. केएल राहुलचं रेटिंग पॉइंट 653 इतकं आहे.

https://www.prahaar.in/2026/10/07/smriti-mandhana-sent-harmanpreet-kaur-a-touching-message-after-the-latter-stepped-down-as-captain/

श्रेयस अय्यरने 18 खेळाडूंना दिली मात

आयसीसी टी20 आंतरराष्ट्रीय रँकिंगमध्ये श्रेयस अय्यरने मोठी झेप घेतली आहे. वेस्ट इंडिजविरुद्धची शतकी खेळी त्याच्या पथ्यावर पडली आहे. श्रेयस अय्यरने वेस्ट इंडिजविरुद्धच्या पहिल्या टी20 सामन्यात 43 चेंडूत 102 धावा केल्या होत्या. त्यामुळे त्याला टी20 क्रमवारीत फायदा झाला आहे. श्रेयस अय्यरने 18 खेळाडूंना मागे टाकत 25व्या स्थानावरून थेट सातव्या स्थानी झेप घेतली आहे.