Nashik : ग्रामीण भागातील प्रत्येक नागरिकाचे आरोग्यमान उंचावण्यासाठी आणि तळागाळातील नागरिकांना दर्जेदार प्राथमिक आरोग्य सेवा उपलब्ध करून देण्यासाठी महाराष्ट्र शासनाच्या सार्वजनिक आरोग्य विभागामार्फत १ एप्रिल २०२६ पासून ‘माझं गाव, आरोग्य संपन्न गाव’ अभियान राबविण्यात येणार आहे. या अभियानाच्या प्रभावी अंमलबजावणीसाठी नाशिक जिल्हा परिषद सभागृहात मुख्य कार्यकारी अधिकारी ओमकार पवार यांच्या मार्गदर्शनाखाली जिल्हास्तरीय कार्यशाळा घेण्यात आली. नाशिक जिल्ह्यातील १,३८० ग्रामपंचायतींमध्ये हे अभियान लोकचळवळीच्या रूपात राबवून ‘विकसित महाराष्ट्र २०४७’च्या ध्येयाशी सुसंगत आरोग्य क्षेत्रात जिल्ह्याला आदर्श बनविण्याचा संकल्प करण्यात आला. अभियानाची ३१ मार्चपर्यंत सर्व पूर्वतयारी पूर्ण करण्याचे निर्देश देण्यात आले.

https://www.prahaar.in/2026/09/24/nashik-crime-news-bmc-bmc-official-murdered-in-igatpuri-woman-and-her-two-children-arrested-shocking-motive-behind-the-murder-revealed/

अभियानाचे उद्दिष्ट

‘प्रजा निरोगी, तर राज्य सशक्त’

प्रत्येक नागरिकाला घराजवळ सर्वसमावेशक, मोफत व गुणवत्तापूर्ण आरोग्य सेवा.

आरोग्याला ग्रामविकासाच्या केंद्रस्थानी आणणे.

१,३८० ग्रामपंचायतींमध्ये लोकचळवळीद्वारे आरोग्यविषयक उपक्रम राबविणे.

३१ मार्चपर्यंत पूर्वतयारी पूर्ण करून १ एप्रिलपासून अभियानाची प्रभावी अंमलबजावणी.

“ग्रामीण भागात आरोग्याची मोठी चळवळ उभी करण्याची गरज आहे. आरोग्य विभागातील अधिकारी, कर्मचारी, आशा स्वयंसेविका, अंगणवाडी सेविका आणि ग्रामपंचायतींच्या सरपंचांनी आघाडीवर राहून काम करावे. सामूहिक प्रयत्नांतून नाशिक जिल्ह्याला अभियानातील स्पर्धा व गुणांकनात राज्यपातळीवर उच्च स्थानी नेण्यासाठी प्रत्येकाने कटिबद्ध राहावे असे डॉ. जयंत आडे (भा.प्र.से.) यांनी म्हटले आहे.